УКРАИНА

Зеленски најави нова ера: Украина потпиша 10-годишни воени договори со заливските држави

Украинскиот претседател Володимир Зеленски изјави дека Украина склучила „историски“ одбранбени договори со земји од Блискиот Исток, со кои се отвора ново поглавје во воено-технолошката соработка.Договорите се потпишани со Катар, Саудиска Арабија и Обединети Арапски Емирати и предвидуваат стратешка соработка во период од десет години. Иако деталите не се јавно објавени, Зеленски откри дека тие вклучуваат и украинско искуство во справување со беспилотни летала.Клучен сегмент од соработката е размената на технологии, при што Украина нуди поевтини системи за пресретнување на дронови, како алтернатива на скапите противвоздушни ракети што ги користат земјите од Заливот.Овие договори доаѓаат во време на засилени безбедносни предизвици во регионот, каде беспилотните летала стануваат сè почесто средство во современите конфликти, што ја прави украинската експертиза особено барана на меѓународниот пазар.

Свет | пред 10 часа

(Видео) Руски аналитичар тврди: „Осудени сме на пораз во Украина“

Рускиот воен аналитичар Константин Сивков, кој во 2014 година тврдеше дека Киев ќе падне „за два до три дена“, сега јавно предупредува на можен пораз на Русија во војната против Украина.Сивков, потпретседател на Академијата за геополитички проблеми и резервен капетан од прва класа во руската морнарица, во ново интервју изнесе значително поинаква и песимистичка проценка.„Осудени сме на пораз. Економскиот потенцијал на Западот повеќекратно го надминува рускиот и тој потенцијал веќе се претвора во воена предност“, изјавил Сивков.Тој предупредува дека предноста на Западот особено се гледа во производството на вооружување и беспилотни летала, наведувајќи дека масовните напади со дронови бараат и огромни количини противвоздушни ракети.Според него, Русија се соочува со две опции – или да прифати, како што вели, „понижувачки мир“, или да се обиде да постигне одлучувачка воена победа, за која признава дека во моментот нема капацитет.Војната меѓу Русија и Украина започна во 2014 година со анексијата на Крим и конфликтот во Донбас, а ескалираше во целосна инвазија во 2022 година. Наместо брз колапс на Украина, конфликтот прерасна во долготрајна војна на исцрпување, со сè поголем притисок врз воените и економските ресурси на двете страни.

Свет | пред 13 часа

Зеленски: Русија му помогнала на Иран во нападот врз американска база, нивните сателити трипати снимале пред ударот

Украинскиот претседател Володимир Зеленски изјави дека Русија споделувала разузнавачки информации со Иран, што наводно помогнало во нападот врз американска воена база во Саудиска Арабија.Во интервју за NBC News, Зеленски тврди дека руските сателити ја снимале базата „Принц Султан“ во три наврати – на 20, 23 и 25 март, по што следел напад на 26 март, во кој биле ранети американски војници и оштетена воена опрема.„Сто проценти сум сигурен дека Русија споделува вакви информации со Иран“, изјави Зеленски, повикувајќи се на податоци од украинските разузнавачки служби. Според него, повтореното сателитско снимање е јасен индикатор за подготовка на напад.Американски претставници потврдиле дека во нападот имало повредени војници, но нагласиле дека станува збор за полесни повреди. Информациите за руско учество, засега, не се независно потврдени.Во меѓувреме, Сергеј Лавров ги отфрли ваквите наводи, иако призна дека Москва има долгорочна воена соработка со Техеран.Зеленски предупредува дека војната на Блискиот Исток ѝ одговара на Москва, посочувајќи дека растот на цените на нафтата и евентуалното олеснување на санкциите може да ѝ донесат дополнителни приходи на Русија.Воедно, тој изрази загриженост дека дел од американската воена помош би можела да биде пренасочена од Украина кон Блискиот Исток, што би ја ослабнало украинската одбрана.Киев, како што нагласи Зеленски, останува подготвен за преговори со Москва, но не и на територија на Русија или Белорусија, кои ги смета за сојузници во конфликтот.

Свет | пред 1 ден

(Видео) Трет напад неделава: Дронски удар врз клучен руски нафтен терминал

Клучниот руски енергетски терминал во пристаништето Уст-Луга беше погоден во украински напад со беспилотни летала, при што избувна пожар и беше нанесена материјална штета.Информацијата ја соопшти гувернерот на Ленинградската област, Александар Дрозденко, кој наведе дека во текот на нападот биле соборени вкупно 36 дронови над регионот.Станува збор за еден од најважните руски извозни пунктови за нафта, со дневен капацитет од околу 700.000 барели. Според достапните податоци, во текот на 2025 година преку терминалот биле транспортирани околу 32,9 милиони метрички тони нафтени производи.Со терминалот управува Транснефт, клучен играч во руската енергетска инфраструктура.Ова е трет напад врз ова пристаниште во текот на неделата, што укажува на засилена стратегија на Украина за таргетирање на руската енергетска инфраструктура.Нападите врз нафтени терминали и рафинерии се дел од пошироките напори на Киев да ја ослаби економската основа на Москва, односно приходите кои директно ја финансираат воената машинерија на Русија.

Свет | пред 1 ден

Смртоносни напади меѓу Русија и Украина: загинати цивили од двете страни

Најмалку четири лица загинаа во руските ноќни воздушни напади врз Украина, додека во украински напад на руска територија е убиено дете, соопштија локалните власти од двете земји, во нов бран ескалација на конфликтот.Во јужниот украински град Одеса, според локалните власти, загинале две лица, а најмалку 13 се повредени, откако бил погоден и објект на родилиште.„Немаше апсолутно никаква воена цел таму. Станува збор едноставно за чист тероризам против цивилни животи“, изјави украинскиот претседател Володимир Зеленски.Нападите предизвикале значителна материјална штета, вклучително и на пристанишната инфраструктура во регионот на Одеса, каде биле регистрирани повеќе удари.Според украинските воздухопловни сили, во текот на ноќта Русија лансирала 273 дрона, од кои 252 биле соборени.Во друг напад, во Криви Рог, бил убиен еден маж откако била погодена индустриска постројка, при што избувнале пожари.Во централна Украина, во Полтавската област, едно лице загинало откако дронови погодиле станбена зграда и индустриски објекти.„Секој ваков напад е доказ дека Русија нема намера да ја заврши оваа војна. Затоа, секое попуштање на притисокот врз неа е опасно“, изјави Зеленски.Истовремено, руските власти соопштија дека во украински напад со дрон врз Јарослављ, северно од Москва, загинало дете.Според руските информации, во текот на ноќта биле пресретнати и уништени 155 украински дронови во рускиот воздушен простор.Нападите доаѓаат во контекст на континуирани воздушни операции од двете страни, при што конфликтот, кој трае од февруари 2022 година, продолжува да носи жртви и уништување на цивилна и стратешка инфраструктура.

Свет | пред 2 дена

Ако Зеленски дојде до нуклеарно оружје, Европа ќе биде првата жртва на уцена, вели Захарова

Портпаролката на руското Министерство за надворешни работи, Марија Захарова, изјави дека Западна Европа би била „првата жртва на уцена“ доколку украинскиот претседател Володимир Зеленски дојде до нуклеарно оружје. Пораката ја поврза со барањата на Киев безбедносните гаранции за Украина да опфатат и прашања поврзани со нуклеарното вооружување.Според Захарова, во вакво сценарио Зеленски, покрај финансиска и воена поддршка, би поставувал услови пред западните земји во насока на, како што таа го опиша, „одржување на својот режим“. Таа оцени дека притисокот би се пренел врз европските држави и дека токму тие би се нашле меѓу првите изложени на ризик.Захарова повтори дека Москва инсистира Украина да има ненуклеарен статус, нагласувајќи дека тоа, според руската позиција, е „принципиелен став“ поврзан со причините за украинската криза.Изјавата доаѓа во контекст на продолжените тензии меѓу Русија и Западот околу моделот на безбедносни гаранции за Украина и долгорочната архитектура на европската безбедност.

Свет | пред 2 дена

Зеленски пристигна во Доха – нова дипломатска офанзива

Украинскиот претседател Володимир Зеленски пристигна во Доха на работна посета, продолжувајќи ја својата дипломатска турнеја на Блискиот Исток.Според информациите на Катарската новинска агенција, Зеленски бил пречекан на Меѓународниот аеродром во Доха од државниот министер за надворешни работи Мохамед бин Абдулазиз ал-Кулаифи, како и од украинскиот амбасадор во Катар, Андриј Кузменко.„Неговата екселенција, претседателот на Украина Володимир Зеленски, пристигна утринава во Доха на работна посета“, се наведува во соопштението.Посетата следува по неодамнешната посета на Обединетите Арапски Емирати, каде Зеленски разговараше за безбедносна и одбранбена соработка.Се очекува во наредниот период да бидат објавени повеќе детали за агендата и средбите во рамки на посетата.

Свет | пред 2 дена

Зеленски: Нема услови за трипартитен состанок со САД и Русија

Нема услови за одржување на трипартитен состанок меѓу Украина, САД и Русија, изјави украинскиот претседател Володимир Зеленски, посочувајќи дека безбедносните ограничувања и несогласувањата околу локацијата ги блокираат разговорите.Зеленски нагласи дека комуникацијата со американската страна е континуирана, но дека постојат сериозни пречки за директни средби.„Ние секојдневно разговараме со американската страна, нашиот преговарачки тим разговара со своите колеги. Сепак, постои една потешкотија, се чувствуваме како посредници во овој процес, а не како страна во војната. Зошто? Затоа што сме подготвени да се сретнеме било каде, пожелно во трипартитен формат, но американската страна може само во Америка, а Русија може насекаде, но не во Америка“, изјави Зеленски.Тој посочи дека дополнителен фактор е актуелната безбедносна ситуација.„И засега, поради војната на Блискиот Исток и војната со Иран, Американците, односно тимовите, од безбедносни причини не патуваат во странство“, додаде Зеленски.Поради ваквите околности, засега нема утврден датум за нов трипартитен состанок.

Свет | пред 2 дена

Руски напад врз Одеса – загинато едно лице, 11 повредени

Едно лице загина, а 11 се повредени, меѓу кои и дете, во руски ноќен напад врз цивилна инфраструктура во Одеса, соопштија украинските власти.Според началникот на Одеската воена администрација, Сергиј Лисак, жртвата им подлегнала на повредите во болница.„Од седум часот, за жал, познато е дека едно лице почина во болница од последиците од здобиените повреди“, напиша Лисак.Тој информираше дека вкупно 11 лица се повредени, вклучително и едно дете, и дека сите добиле неопходна медицинска помош.Според украинските медиуми, руската војска во текот на ноќта извршила масовен напад со дронови врз Одеса, при што на повеќе локации во градот избувнале пожари.Нападот предизвикал значителна штета врз цивилната инфраструктура и дополнително ја влошил безбедносната состојба во регионот.

Свет | пред 2 дена

Девојката од Украина која барала помош пред маркети во Скопје, ги одбила сите видови понудена помош, објави украинското здружение во земјава

Здружението на Украинците во Република Македонија „Лесја Украинка“ информира дека девојката со мало дете, која се претставува како украинска државјанка и бара милостина во центарот на Скопје, ги одбила сите понудени форми на помош.Од здружението соопштија дека по добиените информации за нејзиното присуство пред маркетите од синџирите КАМ и Тинекс, нивни претставници стапиле во директен контакт со неа и ѝ понудиле сеопфатна поддршка.Во разговорот, како што наведуваат, ѝ биле објаснети можностите за законски престој во земјава, вклучително и добивање дозвола за привремен престој од хуманитарни причини, азил или туристички престој. Понудени ѝ биле и услуги од преведувач, како и помош при подготовка на потребната документација.Дополнително, ѝ било препорачано да стапи во контакт со конзуларниот оддел на Амбасадата на Украина во државата, а ѝ било понудено и посредување за обезбедување сместување, вработување и материјална помош во вид на храна, облека и основни потреби. Од здружението биле подготвени да ѝ обезбедат и СИМ-картичка, бидејќи, како што посочила, немала телефонски број.Во меѓувреме, истиот ден, како што информираат, и други организации понудиле поддршка, меѓу кои хуманитарната организација „Св. Спас“, Црвен крст на град Скопје, како и „Легис“ и „Екрауд“ фондацијата.„Како резултат на тоа, оваа државјанка ги одби сите видови понудена помош. Таа изрази незадоволство што нејзината приказна доби јавност, изјавувајќи дека тоа „ѝ пречи да собира пари“. И покрај ветувањето дека сама ќе купи телефонска картичка и ќе стапи во контакт со претставниците на Здружението, во текот на изминатите два дена таа не се јави“, напишаа од Здружението на Украинци во Македонија.Од „Лесја Украинка“ посочуваат дека ги презеле сите можни чекори за помош и се оградуваат од понатамошната одговорност за нејзината состојба и легалноста на нејзиниот престој, нагласувајќи дека натамошното постапување е во надлежност на институциите.Воедно, упатуваат благодарност до граѓаните за нивната внимателност и апелираат до јавноста да ги информира доколку девојката повторно биде забележана.

Скопје | пред 3 дена

Лавров: Украина и Иран не се исто

Рускиот министер за надворешни работи Сергеј Лавров во четвртокот изјави дека ситуациите во Иран и Украина се разликуваат, бидејќи, според него, „Киев, заедно со своите западни спонзори, ги прекршил сите меѓународни норми што можело да се прекршат“.Од друга страна, како што рече, Иран „не прекршил никакви меѓународни обврски“.„Која е разликата меѓу ситуацијата во Иран и Украина? Разликата е во тоа што Исламската Република Иран не прекршила никакви меѓународни обврски, вклучително и оние што се однесуваат на иранската нуклеарна програма... Украина, заедно со своите западни спонзори, прекршила сè што можело да се прекрши“, изјави Лавров во интервју за телевизијата „Франс“.Според неговите зборови, во случајот со Украина, Русија предупредувала дека Франција, Германија и други западни земји ја водат ситуацијата кон криза, а исто така предложила склучување договор за безбедносни гаранции со САД и НАТО во декември 2021 година.„Ни беше кажано дека тоа не нè засега и дека Украина ќе влезе во НАТО“, нагласи Лавров.Тој додаде дека за време на преговорите за Украина, лидерите на Европската унија и НАТО се обидувале да ја одвратат американската делегација од договорите постигнати меѓу рускиот и американскиот претседател Владимир Путин и Доналд Трамп во Енкориџ, Алјаска.„Сите наредни преговори по Енкориџ беа отежнати од фактот што ЕУ и раководството на НАТО, пред сè Урсула фон дер Лајен и Марк Руте, на секој начин се обидуваа да ги поткопаат тие разбирања и да ја одвратат американската администрација од договорите што ги поддржавме“, изјави Лавров.Тој додаде дека САД се обидуваат да обезбедат Киев да се согласи со договорите постигнати на самитот во Енкориџ.„Гледам дека американската страна настојува да направи сè за да обезбеди Киев да го прифати договорот што го постигнаа претседателите на Русија и САД на Алјаска“, изјави Лавров.Според него, по реализацијата на тие договори ќе останат уште низа прашања што треба да се решат меѓу Москва и Киев, бидејќи тие не биле сеопфатни.Тој посебно ги спомена прашањата за рускиот јазик и канонската Украинска православна црква, оценувајќи дека без притисок од ЕУ и НАТО не треба да се очекуваат чекори од Киев.Лавров го коментираше и предлогот за распоредување стабилизациски сили во Украина по евентуално примирје, оценувајќи дека тоа би претставувало „отворена окупација на земјата“.„Сега зборуваат дека Западот ѝ ветува на Украина ‘безбедносни гаранции’. Францускиот претседател Макрон повеќепати тврдеше дека тие гаранции, вклучително и распоредување ‘стабилизациски сили’, се решение, што на крај би значело чиста окупација“, заклучи шефот на руската дипломатија.

Свет | пред 3 дена

Русија изврши масовен напад со дронови врз Украина

Русија денеска изведе еден од најмасовните напади врз Украина со „повеќе од 400 дронови“, соопшти Јуриј Игнат, портпарол на украинските воздухопловни сили. Дел од нападите го погодија и историскиот центар на Лавов, кој е на списокот на светско наследство на УНЕСКО.Украинскиот министер за надворешни работи, Андриј Сибиха, истакна дека нападите со ирански дронови го копираат моделот на терор кој Иран го применува на Блискиот Исток. Во нападот во Лавов најмалку 13 лица се повредени.Претходно, Русија ноќта на вторник лансирала 392 дрона и 34 проектили, од кои дел биле пресретнати, при што загинале најмалку пет лица. Дипломатските преговори меѓу Киев и Москва, со посредство на САД, се во застој поради ескалацијата на конфликтот на Блискиот Исток.

Свет | пред 6 дена

(Видео) Руски дрон удри во зграда во Украина

Денеска, во текот на денот, Русија изврши напад врз центарот на Лавов, при што две лица се тешко повредени, објави украинската премиерка Јулија Свириденко. Во објавата на социјалната мрежа X таа истакна дека нападот го извршиле руски и ирански дронови и додаде дека една од погодените локации била црквата Свети Андреј од 17 век, која е дел од светското наследство на УНЕСКО.„Русија може да се запре само со сила, бескомпромисни санкции и решителна акција“, порача Свириденко.Во меѓувреме, војната во Украина, која започна на 24 февруари 2022 година со инвазијата на Русија, влегува во својата петта година. Станува збор за конфликт со ограничени територијални промени, но со постојани напади врз инфраструктурата и градовите. Според податоците на Обединетите нации и западните проценки, бројот на цивилните жртви надминува 15.000, додека вкупните воени загуби се проценуваат на 1,8 до 2 милиони, со тоа што Русија претрпела поголеми загуби, а Украина стотици илјади.

Свет | пред 6 дена

Руските безбедносни сили подготвени за можни саботажни операции врз државни функционери и воени објекти

Руска Федерална служба за безбедност (FSB), полиција и Национална гарда во Москва се ставени во состојба на повишена подготвеност поради разузнавачки податоци дека постои закана од саботажен напад од Украина.Како што денес објави руската државна новинска агенција RIA Novosti, FSB добила разузнавачки податоци дека Украина планира саботажи и напади врз „државни функционери, воен персонал на руското Министерство за одбрана и службеници за спроведување на законот“.Се потсетува дека за време на четиригодишната војна меѓу Русија и Украина, двете страни изведувале напади далеку зад фронтовските линии, користејќи дронови и саботажни единици за убиства и напади врз критична инфраструктура.Исто така, генерал-потполковникот Владимир Алексеев, заменик-шеф на руската воена разузнавачка служба GRU, во февруари трипати бил нападнат со пиштол Макаров опремен со пригушувач во станбена зграда на автопатот Волоколамски на северот на Москва.

Свет | пред 6 дена

Зеленски бара засилување на санкциите против Русија: „Мора да бидат ефикасни“

Украинскиот претседател Володимир Зеленски во неделата ги повика сојузниците да го зголемат притисокот врз Русија преку санкции, во пресрет на вториот ден од разговорите меѓу украинската и американската делегација за ставање крај на четиригодишната војна започната со руската инвазија. Руски претставници не учествуваат во оваа рунда разговори, кои започнаа во саботата на Флорида.Американската делегација ја предводат специјалниот пратеник Стив Виткоф и Џаред Кушнер. Зеленски порача дека санкциите мора да бидат поефикасни, особено против т.н. „сенчеста флота“ на Русија, која се користи за извоз на нафта и обезбедување приходи за финансирање на војната.„Приходите ѝ даваат на Русија чувство на неказнивост и можност да ја продолжи војната. Затоа притисокот мора да продолжи“, напиша Зеленски, додавајќи дека танкерите поврзани со оваа флота треба да бидат запирани и блокирани.Минатата недела, по наредба на француските власти, беше запленет танкер во Средоземното Море, за кој францускиот претседател Емануел Макрон изјави дека е дел од руската „сенчеста флота“, мрежа што ѝ овозможува на Москва да ги заобиколува западните санкции.Во меѓувреме, мировниот план што го поддржуваат САД вклучува можност за одржување претседателски избори во Украина и потенцијални територијални отстапки. Зеленски се соочува со притисок од Доналд Трамп да распише избори, иако украинските закони не дозволуваат изборен процес за време на воена состојба. Тој изјави дека избори би биле можни доколку се обезбеди двомесечен прекин на огнот.Сепак, поранешниот врховен командант на украинската армија Валериј Залужни се спротивстави на оваа идеја, оценувајќи дека на земјата ѝ е потребен „мир, а не избори во војна“, наместо избори во актуелните услови.

Свет | пред 1 седмица

Зеленски: Имам многу лошо чувство

Украинскиот претседател Володимир Зеленски изрази сериозна загриженост дека војната меѓу САД и Израел со Иран го пренасочува вниманието на Вашингтон од руската агресија врз Украина.Во интервју за Би-Би-Си, снимено за време на неговата посета на Лондон, Зеленски оцени дека развојот на настаните на Блискиот Исток има директни последици врз украинската позиција на меѓународната сцена.„Имам многу лошо чувство во врска со влијанието на овој конфликт врз Украина. За жал, Америка сега е повеќе фокусирана на Блискиот Исток отколку на Украина“, изјави Зеленски.Како конкретна последица, тој го посочи застојот во дипломатските активности, нагласувајќи дека планираните трилатерални состаноци се одложуваат.„Нашите дипломатски, трилатерални средби постојано се одложуваат. Причината е само една – војната со Иран“, додаде украинскиот претседател.Сепак, Зеленски истакна дека комуникацијата меѓу Киев и Вашингтон продолжува на дневна основа, како и контактите меѓу САД и Русија.Тој откри дека постоел предлог за состанок на највисоко ниво во САД, кој Украина го прифатила, но бил одбиен од руската страна.„Американската страна предложи да биде домаќин на средба меѓу двете страни. Ние се согласивме, но Русија го одби тој предлог. Затоа сега се чека нов термин и локација“, рече Зеленски, додавајќи дека Украина е подготвена да прифати било кој датум и место, освен Русија.Изјавите на Зеленски доаѓаат во момент кога глобалниот фокус сè повеќе се насочува кон ескалацијата на Блискиот Исток, што, според него, директно влијае врз дипломатската и воената поддршка за Украина.

Свет | пред 1 седмица

Украински инструктори изненадени од американската тактика: скапи ракети против евтини дронови

Украински воени инструктори испратени на Блискиот Исток изразиле изненадување од начинот на кој американските сили и нивните сојузници се справуваат со иранските напаѓачки дронови, оценувајќи дека се користат непропорционално скапи средства за нивно пресретнување.Според нивните сведоштва, во одредени случаи биле лансирани и до осум ракети од системот „Патриот“ за соборување на една цел, при што секоја ракета чини повеќе од три милиони долари. Овој пристап, како што наведуваат, значително ја зголемува цената на одбраната во однос на самата закана, со оглед дека дроновите од типот „Шахед“ чинат околу 70.000 долари.Украинските офицери посочуваат дека нивното искуство од војната со Русија довело до развој на поефикасни и поекономични тактики, вклучително и оптимизирање на бројот на пресретнувања и подобро управување со ресурсите. Тие изразиле зачуденост што нивните пресметки и оперативни искуства не се доволно искористени од страна на западните сојузници.Дополнително, критики има и за начинот на заштита на клучната воена опрема. Украинските експерти наведуваат дека во некои случаи скапи радари биле стационирани на исти позиции подолг период, што ги направило лесна цел за евтини дронови. Според нив, токму мобилноста и постојаното менување на позициите се клучни за преживување на вакви системи.Еден од примерите што го наведуваат е уништување на радар вреден околу една милијарда долари, погоден од неколку евтини беспилотни летала. Ова, според нив, покажува дека современото војување сè повеќе се сведува на асиметрични конфликти, каде што поевтините технологии можат да нанесат сериозни штети на скапи системи.Украинската страна нагласува дека нивното искуство во одбрана од дронови е меѓу најголемите во светот и дека може да биде од значајна корист за земјите кои се соочуваат со слични закани.Во меѓувреме, претседателот Володимир Зеленски потврди дека Украина испратила тимови експерти во неколку земји од Заливот, со цел да помогнат во одбраната од ирански дронови и ракети, што укажува на зголемена воена соработка во услови на поширока регионална ескалација.

Свет | пред 1 седмица

Напад со 500 војници и десетици возила одбиен за четири часа - Украина за жестоките борби кај Лиман

Украинските сили соопштија дека на 19 март одбиле масовен руски напад во близина на Лиман, оценувајќи дека станува збор за најголем обид за пробив на правецот Лиман–Борова во последниот период.Според Третиот армиски корпус, руските сили нападнале истовремено на седум правци, ангажирајќи повеќе од 500 војници, 28 оклопни возила и над 100 мотоцикли. Украинската страна тврди дека нападот бил одбиен за околу четири часа, благодарение на координирана одбрана долж целата линија на фронтот.Користењето мотоцикли и лесни возила, според анализите, укажува на обид за брзо распоредување и расфрлање на јуришни групи на повеќе точки. Сепак, таквата тактика остава малку заштита на единиците, особено откако ќе бидат изложени на артилериски оган, беспилотни летала и противоклопни системи.Украинскиот корпус соопшти дека руските загуби вклучуваат 84 мотоцикли, 11 борбени возила на пешадијата и оклопни транспортери, како и три тенка. Наведено е и дека бил погоден тежок термобаричен ракетен систем ТOС-1А „Солнцепјок“, пет артилериски орудија, како и повеќе од 160 беспилотни летала.Според украинското Министерство за одбрана, само на 19 март руските сили загубиле 1610 војници, три тенка, 21 оклопно возило, 31 артилериски систем и 1480 беспилотни летала од оперативно-тактичко ниво.Командантот на корпусот, генерал Андриј Билецки, изјави дека украинските сили со недели се подготвувале за ваков напад, откако забележале интензивирање на руските активности, вклучително и поставување понтонски премини и расчистување на мински полиња.Тој посочи дека за секој сектор биле подготвени одбранбени планови, што овозможило навремено и координирано одбивање на нападот на сите правци.Овие информации не се независно потврдени, а борбите на овој дел од фронтот продолжуваат без значителни територијални поместувања.

Свет | пред 1 седмица

Зеленски: „Никому не му треба војна, особено сега“ – продолжуваат разговорите со САД

Претседателот на Украина, Володимир Зеленски, порача дека „никој не ја посакува војната, особено сега“, нагласувајќи дека е клучно да продолжи дипломатијата во обидите за завршување на руската агресија врз Украина.Според неговата изјава, украинската делегација во саботата одржала средба со претставници на Соединетите Американски Држави, а разговорите треба да продолжат и денес. Зеленски во своето видео-обраќање истакнал дека за целиот свет е важно дипломатските канали да останат отворени и активни.Украинскиот лидер посочи дека суштинското прашање е да се разбере до каде е подготвена да оди руската страна за навистина да се дојде до крај на војната, и дали тоа би се направило „чесно и достоинствено“.Во истиот контекст, Зеленски оцени дека моментот е дополнително чувствителен бидејќи, како што рече, геополитичките проблеми се зголемуваат поради актуелната иранска ситуација, што ја прави потребата од деескалација и дипломатски напредок уште поитна.Во веста се наведува дека украинската делегација пристигнала во Мајами, Флорида, за средби со американски претставници. Во составот на украинскиот тим се споменуваат високи функционери од безбедносниот и политичкиот врв, додека од американска страна се најавуваат претставници блиски до Белата куќа.

Свет | пред 1 седмица

Украина изненади со голема офанзива

По исклучувањето на пристапот на руските сили до Starlink во февруари, украинските единици започнаа офанзива и остварија најголем територијален напредок на домашен терен во повеќе од две години. Рускиот команден состав остана без критичен пристап до видеопреноси од бојното поле во реално време и директна комуникација со единиците, што им овозможи на украинските сили да напредуваат кон руските позиции со намалена закана од дронови.Според Wall Street Journal, Украина од февруари ослободи околу 388,5 км² во јужните региони Запорожје и Днепропетровск, каде претходно руските сили забележуваа брз напредок. Аналитичарите наведуваат дека февруари бил првиот месец од 2023 година во кој Киев врати повеќе територија отколку што изгуби.Украинските војници истакнуваат дека исклучувањето на Starlink било клучен фактор за успешната контраофанзива. „Без Starlink, практично се вратија на комуникациски методи од Студената војна“, изјави еден од нив. Рускиот персонал кој се потпирал на Starlink за координација со дронови и контрола на единиците, сега се соочи со изолација и намалена оперативна ефикасност.Овој прекин создаде можност за Украина да спроведе мали, но ефективни напади на руски позиции, нарушувајќи ја комуникацијата и создавајќи хаос. Во првите недели, украинските сили успеаја да ги потиснат Русите од периферијата на градот Запорожје, намалувајќи го бројот на артилериски напади.Русија сега се обидува да најде алтернативни решенија, користејќи кабли за комуникација, безжични мрежи и сателитски услуги од Русија и Кина, но досега ништо не се покажало толку ефикасно како Starlink. Внатрешните несогласувања околу користењето на различни комуникациски системи, вклучувајќи ја и забраната на Telegram во корист на државниот систем Max, дополнително го отежнуваат враќањето на нивната оперативна ефикасност.Напредокот на украинската армија по губењето на Starlink покажува колку е критична комерцијалната сателитска комуникација во современото воено делување и колкава контрола може да има еден приватен оператор врз конфликтот.

Свет | пред 1 седмица

Руски напад со дронови ја остави речиси цела Черниговска област без струја

Поголемиот дел од северната украинска област Чернигов остана без електрична енергија по руски напад со дронови, соопшти регионалниот гувернер Вјачеслав Чаус. Екипите се на терен и работат на санирање на штетите, додека властите предупредуваат на сериозни последици врз функционирањето на регионот.Според локалните власти, главниот град Чернигов е целосно без струја. Областа, која се граничи со Русија и Белорусија, пред почетокот на војната имала близу еден милион жители, што ја прави една од клучните во однос на инфраструктурата и безбедноста.Русија во текот на војната систематски ја таргетира украинската енергетска инфраструктура, што резултира со чести и долготрајни прекини на електричната енергија низ целата земја, особено во зимските месеци. Овие напади дополнително го отежнуваат секојдневниот живот на граѓаните и функционирањето на институциите.Во меѓувреме, финансиската поддршка од Европската Унија, која е клучна за стабилизација на системот, се соочува со политички блокади. Иако беше договорен пакет помош вреден 90 милијарди евра, неговата исплата е стопирана поради вето од унгарскиот премиер Виктор Орбан.Од Брисел се бараат алтернативни механизми за обезбедување средства за Киев, додека украинските власти предупредуваат дека навремената финансиска поддршка е клучна за одржување на државниот систем и одбраната, во услови на продолжената војна.

Свет | пред 1 седмица

Украина испрати 228 експерти на Блискиот исток

Украинскиот претседател Володимир Зеленски потврди дека Украина испратила 228 експерти на Блискиот исток за да им помогнат на земјите во одбраната од напади со беспилотни летала, како и дека се работи на склучување „сериозни договори“ со регионалните лидери, објави Reuters.Зеленски најави дека украинските и американските работни групи ќе продолжат да работат на билатерални документи, а за време на викендот во САД ќе се дискутира и за сеопфатен договор за беспилотни летала.Претходно, Русија објави дека преговорите меѓу САД, Русија и Украина за завршување на војната се во „ситуациска пауза“, главно поради конфликтот со Иран. Портпаролот на Кремљ, Дмитриј Песков, рече дека станува збор за привремено запирање и дека Москва очекува продолжување на преговорите штом американската страна повторно се фокусира на украинското прашање.Зеленски порача дека преговорите би можеле да започнат веќе овој викенд, откако Вашингтон испратил сигнали за подготвеност за нов круг. Украинскиот преговарачки тим веќе е на пат за САД, иако сѐ уште не е познато во кој формат ќе се одржат разговорите и кои ќе учествуваат.Директорката на американската национална разузнавачка заедница, Тулси Габард, истакна дека Русија сѐ уште има предност на теренот и веројатно ќе ја продолжи стратегијата на исцрпување додека не се постигне договор.Претходно страните веќе преговарале во Турција, а со посредство на САД и во Абу Даби и Женева, но сѐ уште постојат длабоки разлики, особено околу руските територијални барања кои Украина ги одбива.

Свет | пред 1 седмица

Макрон: Војната со Иран нема да ја одврати Франција од поддршката за Украина

Францускиот претседател Емануел Макрон изјави дека војната против Иран нема да го одвлече вниманието на Париз од поддршката за Украина, нагласувајќи дека Франција ќе остане посветена и покрај ескалацијата на конфликтот меѓу Израел и САД со Иран.„Остануваме на курсот“, напиша Макрон на платформата Икс, додавајќи дека Франција нема да се откаже од поддршката за Украина, каде што, како што истакна, сè уште трае руската агресија.Неговата изјава следува откако француската морнарица пресретна нафтен танкер поврзан со таканаречената руска „флота во сенка“ во западниот дел на Средоземното Море.Според официјални лица, постоело сомнение дека бродот, кој пловел од Мурманск, оперирал под лажно знаме, по што француските сили се качиле на него.

Свет | пред 1 седмица

Орбан повторно доби закани

Унгарскиот премиер Виктор Орбан добил нова закана со смрт од Украина, овојпат од инфлуенсер кој го поддржува украинскиот претседател Володимир Зеленски, објави порталот „Маѓар Немзет“.Во видео објавено на Јутјуб каналот на аналитичката платформа „Ресургам“, основачот на порталот, Дмитро Корнијенко, го навредува унгарскиот премиер и демонстративно покажува самурајски меч.Заканите следуваат во контекст на претходни изјави на украинскиот претседател, кој порано изјави дека ќе испрати војници во Унгарија за да „разговараат“ со Орбан.Корнијенко во видеото сугерира дека најефикасна „казна“ за Орбан би била негов изборен пораз, додека мечот го користи како симбол на закана.Овие случувања доаѓаат во момент кога Орбан продолжува да става вето на одобрувањето кредити за Украина.

Свет | пред 1 седмица

Зеленски алармира: Војната на Блискиот Исток ја остава Украина без ракети

Украина се соочува со ризик од сериозен недостиг на клучни ракети за противвоздушна одбрана поради ескалацијата на конфликтот на Блискиот Исток, предупреди украинскиот претседател Володимир Зеленски.Тој оцени дека продолжувањето на војната меѓу САД, Израел и Иран директно влијае врз украинската одбрана, бидејќи ги пренасочува американските ресурси и го намалува капацитетот за снабдување со оружје за Киев.„Имам многу лошо чувство. Преговорите постојано се одложуваат, а причината е една – војната со Иран“, изјави Зеленски, додавајќи дека ваквата состојба му оди во прилог на рускиот претседател Владимир Путин.Според него, долготрајниот конфликт на Блискиот Исток значи зголемување на цените на енергенсите, но и исцрпување на американските резерви и производствени капацитети за противвоздушна одбрана.Зеленски посебно предупреди на можен недостиг од ракети за системот „Патриот“, оценувајќи дека тоа ќе претставува сериозен предизвик за украинската одбрана.„Америка произведува околу 60 до 65 ракети месечно. Тоа се 700 до 800 годишно, а само во првиот ден од војната на Блискиот Исток беа употребени повеќе од 800 ракети“, посочи тој.Украинскиот претседател истакна и дека американскиот претседател Доналд Трамп има амбиција да биде посредник во конфликтот со Русија, но дека неговата стратегија на директна комуникација со Путин отвора прашања за позицијата на Украина.Воедно, Зеленски предупреди на ризик од поделби меѓу западните сојузници и повика на поголема координација, нагласувајќи дека фокусот мора да остане на војната во Украина.„Режимите во Русија и Иран се поврзани и делуваат заеднички. Не смееме да дозволиме такви системи да победат или да ја загрозат Европа“, порача Зеленски.

Свет | пред 1 седмица