Градоначалникот Орце Ѓорѓиевски наместо да најавува нова зона во Ново Лисиче најавена уште пред 4 години од Тимчо Муцунски и Данела Арсовска, нека го одложи стартот на зоната во Реонски Центар со цел да ги воведе и двете зони истовремено. Тоа е барањето на граѓаните, велат од СДСМ Аеродром.
„Го потсетуваме Орце Ѓорѓиевски дека неговиот колега Дејан Митески уште во јули минатата година изјави дека Општина Аеродром изготвила проект и дека чека одобрување од Град Скопје за истовремено воведување на зонското паркирање во Ново Лисиче и во Реонски Центар.
Граѓаните не забораваат. Истовременото воведување на зонското паркирање во Ново Лисиче и Реонски Центар е предизборно ветување на Дејан Митески.
Трпението на жителите на Ново Лисиче е при крај. Градоначалникот Митески наместо да дели лекции за надлежностите на Општина Аеродром, нека седне со својот колега од Град Скопје и нека го договорат истовременото воведување на зонското паркирање во Ново Лисиче и во Реонски Центар.
Парцијалното воведување на зонско паркирање прво во Реонски Центар, ќе предизвика уште поголемо продлабочување на хаосот со паркирањето во Ново Лисиче. И тоа Дејан Митески и Орце Ѓорѓиевски многу добро го знаат.
Тоа што не го знаат е очигледно дека нивниот инает само го зголемува револтот на жителите на Ново лисиче кои немаат намера да останат неми во однос на ова прашање.
Го потсетуваме Дејан Митески дека денеска е последен ден кога може да ја закаже итната седница на Советот на Општина Аеродром и заедно со Орце Ѓорѓиевски итно да го решат проблемот што вештачки го создадоа. Доколку тоа не го направи нека биде подготвен да се соочи со револтот на нашите сограѓани од Ново Лисиче“, се вели во соопштението.
Жителите на Ново Лисиче на протести од 1 април, доколку институциите не одговорат на барањето за одложување на зонското паркирање во Реонски центар
Жителите на Ново Лисиче најавуваат протести од 1 април, доколку надлежните институции не одговорат на нивното барање за одложување на селективното воведување на зонско паркирање во Реонски центар.Преку групата „Ново Лисиче“, тие информираат дека досега немаат добиено никаков одговор од Општина Аеродром и Град Скопје, и покрај доставеното барање за паралелна имплементација на зоните во Ново Лисиче и Реонски центар.Граѓаните потсетуваат дека токму градоначалниците Дејан Митески и Орце Ѓорѓиевски во предизборниот период ветиле дека зонското паркирање ќе се воведува истовремено на двете локации, за да се избегне прелевање на проблемите.„Досегашното одлагање и немање активности на терен во Ново Лисиче не е по вина на граѓаните, туку по вина на институциите“, велат тие, нагласувајќи дека не бараат трајно решение, туку привремено одложување додека не се воспостави систем што ќе важи подеднакво за сите.Во барањето, кое го доставиле до институциите, граѓаните укажуваат дека актуелниот модел создава нееднаквост меѓу жителите на истата општина. Како што наведуваат, дел од граѓаните имаат право на бесплатно паркирање во цела општина, додека други, иако живеат во непосредна близина, плаќаат за истата услуга.Тие предупредуваат дека ваквата практика претставува дискриминација и создава дополнителен финансиски товар за семејствата, особено во секојдневни активности како транспорт на деца, работа и основни обврски.Доколку до крајот на денот не добијат одговор, најавуваат дека протестите ќе започнат веќе од 1 април, со дополнителни информации за локацијата и начинот на организирање.„Не бараме ништо повеќе од тоа што ни беше ветено – еднаквост и фер решение“, порачуваат жителите.
Скопје | пред 2 часа
