Индиските рафинерии го зголемиле увозот на нафта од Латинска Америка и Африка поради нарушувањата во испораките од Блискиот Исток, предизвикани од војната меѓу Израел, Соединетите Американски Држави и Иран, како и ограничувањата во поморскиот сообраќај низ Ормутскиот Теснец.
Според податоците од трговски извори и аналитичката компанија Kpler, Индија во април и мај ја зголемила набавката на нафта од Венецуела, Бразил, Ангола и Нигерија за да го надомести намаленото снабдување од регионот на Персискиот Залив, пренесе Reuters.
Индија, трет најголем увозник на нафта во светот, традиционално најголем дел од суровата нафта го набавува од Блискиот Исток, но воените случувања и нарушувањата во транспортот ги принудиле рафинериите да ги диверзифицираат изворите на снабдување.
Истовремено, Њу Делхи продолжил со купување руска нафта, иако нејзиниот удел во вкупниот увоз се намалил од речиси 50 проценти на околу 35 проценти.
Индија во април увезувала околу 4,57 милиони барели нафта дневно, што е приближно исто ниво како и во март, но значително помалку во споредба со истиот период минатата година.
Увозот од Обединетите Арапски Емирати значително пораснал во текот на април, додека увозот од Саудиска Арабија останал стабилен.
Аналитичарите наведуваат дека Обединетите Арапски Емирати и Саудиска Арабија моментално се меѓу ретките производители од Персискиот Залив кои можат да извезуваат нафта и преку алтернативни рути, надвор од Ормутскиот Теснец, еден од најважните светски енергетски коридори.
Според прелиминарните податоци, Индија во текот на мај треба дополнително да го зголеми и увозот на руска нафта, по привремениот пад предизвикан од ремонт на една од големите домашни рафинерии.
