Индија во јули го зголемила увозот на руска сурова нафта до рекордно ниво и покрај притисокот од САД врз Њу Делхи да ја намали трговијата со Москва.
Русија во јули обезбедила 50,83 отсто од вкупниот индиски увоз на сурова нафта, односно околу 2,47 милиони барели дневно. Тоа е за 62,4 отсто повеќе во споредба со истиот месец минатата година, покажуваат податоците од трговски извори.
Иако јулскиот увоз бил нешто помал од рекордните 2,6 милиони барели дневно во јуни, Русија и натаму останува убедливо најголем снабдувач на индискиот пазар.
Индиските рафинерии од почетокот на годинава почнале да го намалуваат увозот од Русија поради стравувањата од повисоки американски царини. Сепак, нарушувањата во снабдувањето со нафта од Блискиот Исток поради војната со Иран ги натерале повторно да се потпрат на руските испораки.
Во меѓувреме, Вашингтон го зголемува притисокот врз земјите што купуваат руска нафта. Американскиот Сенат овој месец усвои закон со кој се предлага воведување царини од 100 отсто за купувачите на руска нафта, што дополнително би ја усложнило позицијата на Њу Делхи.
Во првите четири месеци од тековната фискална година, која започна во април, рускиот удел во индискиот увоз достигнал 43,25 отсто, со просечен увоз од повеќе од два милиона барели дневно.
Зголемувањето на руската нафта главно се случило на сметка на снабдувачите од Блискиот Исток. Нивниот удел во индискиот увоз паднал од 43 отсто на околу 30 отсто во периодот од април до јули.
Русија останала најголем снабдувач на Индија, додека Обединетите Арапски Емирати го презеле второто место од Ирак.
