Инфлацијата во Германија продолжи да забавува, во јуни падна на 2,3 отсто

Инфлацијата во Германија продолжи да забавува и во јуни, втор месец по ред, поттикната од значително побавното поскапување на енергијата, покажуваат прелиминарните податоци на германскиот завод за статистика „Дестатис“.

Според статистичарите, потрошувачките цени во јуни биле повисоки за 2,3 отсто во споредба со истиот месец минатата година. Во мај годишната стапка на инфлација изнесуваше 2,6 отсто.

— реклама —

Станува збор за најблаг раст на потрошувачките цени од февруари, кога инфлацијата изнесуваше 1,9 отсто.

— реклама —

Цените на енергијата во јуни биле повисоки за 3,4 отсто на годишно ниво, што претставува значително забавување во споредба со мај, кога растот изнесуваше 6,6 отсто, и април, кога беше регистрирано поскапување од 10,1 отсто.

Во исто време, храната во Германија поскапела за 0,4 отсто во однос на лани, додека цените на услугите продолжиле да растат со стапка од 3,1 отсто.

— реклама —

Основната инфлација, која ги исклучува цените на храната и енергијата, останала непроменета на 2,5 отсто.

На месечно ниво, потрошувачките цени во јуни се намалиле за 0,3 отсто, по падот од 0,2 отсто забележан во мај.

Хармонизираниот индекс на потрошувачките цени, кој овозможува споредба меѓу земјите од Европската Унија и еврозоната, покажал годишна инфлација од 2,4 отсто во јуни, што е помалку од 2,7 отсто, колку што изнесуваше во мај.