ДЗС: Инфлацијата во септември 2,7%, храната поскапела за 0,5%

Инфлацијата во Македонија во септември достигна 2,7 отсто на годишно ниво, покажуваат податоците на Државниот завод за статистика. Во споредба со август, трошоците на животот останале на исто ниво, односно месечната стапка на инфлација изнесува 0 отсто.

Септемвриската стапка претставува благо зголемување во однос на претходните месеци. Во јули инфлацијата изнесуваше 2,3 отсто, а во август 2,6 отсто.

— реклама —

Иако вкупниот индекс на трошоците на животот во септември не се променил на месечно ниво, различните категории бележат значителни движења. Најголемо намалување на цените е регистрирано кај рекреацијата, спортот и културата, за 3,7 отсто, а кај транспортот за 3,4 отсто. Цените во рестораните и услугите за сместување се намалиле за 0,3 отсто, а кај информациите и комуникациите за 0,1 отсто.

Од друга страна, најголем месечен пораст од 1,3 отсто е забележан кај покуќнината, опремата и одржувањето на домаќинствата. Храната и безалкохолните пијалаци поскапеле за 0,5 отсто, исто колку и личната нега и разновидните стоки и услуги. Образованието бележи раст од 0,4 отсто, облеката и обувките од 0,3 отсто, а домувањето, водата, електричната енергија, гасот и другите горива од 0,2 отсто.

— реклама —

Индексот на цените на мало во септември во однос на август изнесува 98,7, што значи дека цените на мало во просек се намалиле. На годишно ниво, пак, индексот е повисок за 1,7 отсто.

— реклама —

На податоците реагираше и премиерот Христијан Мицкоски, кој очекува Македонија да биде меѓу земјите со најниска инфлација во регионот и во Европа.

„Очекувам да бидеме земја каде што ќе има, ако не најниска, меѓу најниските две-три инфлации во регионот и во Европа, и ако не највисок, тогаш меѓу првите пет највисоки порасти на бруто-домашниот производ во регионот и во Европа“, рече Мицкоски.

— реклама —

Тој потсети дека во јули инфлацијата изнесувала 2,3 отсто, во август 2,6 отсто, додека очекувањата за храната и безалкохолните пијалаци, според анализите на Државниот пазарен инспекторат, се годишната стапка да биде меѓу 1,5 и 2 отсто.

Септемвриската стапка од 2,7 отсто е трет последователен месец во кој инфлацијата останува под 3 отсто. Сепак, храната и безалкохолните пијалаци и во септември бележат месечен раст од 0,5 отсто, вторпат по ред со иста стапка.