Поставувањето на метална заштитна конструкција на споменикот Македониум во Крушево ќе биде предмет на инспекциски надзор, откако Управата за заштита на културното наследство (УЗКН) соопшти дека за ваквата интервенција не издала конзерваторско одобрение.
Директорката на Управата, Весела Честоева, информира дека иако Македониумот уште во 2025 година бил прогласен за културно добро во опасност и биле утврдени итни мерки за негова заштита, институцијата не добила барање за одобрување на поставувањето на привремената метална конструкција.
„За оваа интервенција не е доставено барање за конзерваторско одобрение. Поради тоа е наложен инспекциски надзор, кој ќе изврши увид на лице место и ќе ја утврди фактичката состојба. По завршувањето на постапката јавноста ќе биде информирана“, изјави Честоева.
Од НУ Завод и музеј – Прилеп, пак, посочуваат дека конструкцијата е поставена како привремена мерка за заштита на споменикот од понатамошно оштетување. Според директорката Мимоза Христоска, таа ќе ги покрива осумте застаклени галерии сè додека не биде изработен основниот проект за целосна конзервација, реставрација и санација.
Христоска потсетува дека Македониумот со години е изложен на сериозни оштетувања предизвикани од влага, протекување и оштетени витражи, додека последните позначајни зафати биле реализирани во 2016 и 2017 година. Таа нагласува дека сегашната конструкција нема да остане трајно, туку во следната фаза ќе биде покриена со лексан, со што нема да биде видлива во сегашниот облик.
Во меѓувреме, Националниот конзерваторски центар соопшти дека по извршениот увид биле констатирани сериозни оштетувања на металната носечка конструкција и витражните стакла. Оттаму оценуваат дека состојбата бара итни конзерваторски интервенции и подготовка на проект за трајна заштита на еден од најзначајните објекти на современото македонско културно наследство.
Поставувањето на металната конструкција предизвика бројни реакции во јавноста, поради стравувањата дека се нарушува препознатливиот изглед на Македониумот. Надлежните институции, сепак, уверуваат дека станува збор за привремена заштитна мерка која треба да го зачува споменикот до почетокот на неговата целосна реконструкција.
