Во Општина Могила се реализира инвестициски циклус вреден околу 700.000 евра, во рамки на кој се спроведуваат повеќе инфраструктурни проекти финансирани од општинскиот и државниот буџет, како и преку програмите на Светска банка, истакна вицепремиерот и министер за транспорт Александар Николоски при денешната посета на општината.
Тој посочи дека дел од проектите веќе се завршени, а дел се во фаза на реализација или подготовка.
„Навистина ми е драго што денеска во Општина Могила ќе посетиме неколку проекти кои што ги работи градоначалникот, дел со средства од буџетот на општината, дел со средства од буџетот на државата, дел преку програмата на Светска банка и навистина ми е драго што веќе гледаме реализирани проекти“, изјави Николоски.
Според него, веќе е реконструирана улицата „Гоце Делчев“, наскоро треба да започне изградбата на улицата „Пелагонија“, а преку проект финансиран од Светска банка се работи на улицата „АСНОМ“. Во рамки на истата програма завршени се и улицата „Шемница“ во Могила, како и една улица во селото Трновци.
„Вкупно зборуваме за еден инвестициски циклус од 700.000 евра во проекти. Драго ми е што реализацијата оди со задоволително темпо и што проектите се реализираат, што ќе значи огромен бенефит за граѓаните“, рече Николоски.
Тој додаде дека во општината веќе функционира спортски комплекс, а во наредните денови се очекува во употреба да биде пуштено и новото фудбалско игралиште, кое е донација од Фудбалската федерација на Македонија.
„Станува збор за еден голем сет на проекти што мислам дека многу ќе значи за жителите на општината. Ние ќе продолжиме да поддржуваме и да реализираме проекти во наредниот период“, нагласи Николоски.
Од локалната самоуправа очекуваат овие инвестиции да придонесат за подобри услови за живот и дополнителен развој на општината.
