Заменик-претседателот на Владата и министер за транспорт, Александар Николоски, при денешната посета на Гевгелија најави дека Владата ќе продолжи со инфраструктурните инвестиции во општината, меѓу кои и изградба на нов влез во градот.
Заедно со градоначалникот изврши увид во реконструкцијата на улицата „Маршал Тито“, проект вреден 81 милион денари, финансиран со поддршка од Владата.
„Овој проект целосно ќе го промени изгледот на овој дел од градот. Покрај обновата на инфраструктурата, ќе се постави подземна инсталација и современо осветлување, што ќе му даде нов дух на просторот и ќе придонесе за развој на локалното стопанство и туризмот“, изјави Николоски.
Тој најави дека Министерството за транспорт ќе го преземе проектот за изградба на нов влез во Гевгелија, кој ќе се реализира во соработка со локалната самоуправа.
Николоски истакна дека досега преку Министерството за транспорт во Гевгелија се инвестирани повеќе од 165 милиони денари. Покрај реконструкцијата на улицата „Маршал Тито“, реализирани се и изградбата на улицата „Новопланирана“, парк со детско игралиште на улицата „Деко Ковачев“, реконструкцијата на дел од булеварот „Гевгелија“ и натпатникот на улицата „Железничка“, како и реконструкција на улици во селата Моин, Прдејци и Богородица. Дополнително, завршена е и третата фаза од изградбата на Западниот булевар со средства обезбедени преку Министерството за транспорт и поддршка од Светска банка.
