Ирански висок воен претставник оцени дека ново избувнување на отворен конфликт меѓу Иран и САД е речиси неизбежно, обвинувајќи го Вашингтон дека од Техеран бара целосна и безусловна капитулација.
Заменик-командантот на Централната команда „Хатам ал-Анбија“, Мохамад Џафар Асади, изјави дека иранскиот народ никогаш нема да прифати предавање, поради што, според него, нова војна би била неминовна доколку продолжи сегашниот пристап на САД.
„САД од нас бараат целосна и безусловна капитулација, а иранската нација никогаш нема да се согласи на предавање. Без наша капитулација, нова војна е едноставно неизбежна“, порача Асади.
Неговата изјава доаѓа во период кога мировните преговори меѓу двете земји се соочуваат со сериозни пречки, а официјален Техеран сè уште нема доставено конечен одговор на американскиот предлог за мировен договор што треба трајно да го затвори конфликтот меѓу двете држави.
Според извор близок до иранскиот преговарачки тим, разговорите за конечната верзија на договорот продолжуваат во државниот врв на Иран. Изворот за агенцијата Мехр посочил дека иранските власти детално ја анализираат секоја одредба од американскиот предлог.
Во Техеран владее голема недоверба кон Вашингтон поради, како што наведуваат иранските претставници, претходни искуства во кои САД не ги почитувале преземените обврски.
„Поукани од претходните горчливи искуства, овојпат Иран бара конкретни, реални и јасни придобивки пред да стави потпис на кој било документ“, изјавил изворот близок до преговарачите.
Иранските власти засега не откриваат кога би можел да биде донесен конечен став за американскиот предлог, додека неизвесноста околу можното мировно решение дополнително ги зголемува тензиите меѓу двете земји.
