Иран најави дека ќе побара од Советот за безбедност на Обединетите нации со посебна резолуција да го поддржи конечниот договор со Соединетите Американски Држави, вклучително и делот што се однесува на иранската нуклеарна програма.
Портпаролот на иранското Министерство за надворешни работи, Есмаил Багаеи, изјави дека Техеран очекува конечниот договор да биде потврден со резолуција на Советот за безбедност во рок од 60 дена по неговото потпишување.
„Очекуваме конечниот договор да биде поддржан со резолуција на Советот за безбедност на ОН во рок од 60 дена“, изјави Багаеи, додавајќи дека Иран ќе „учи од минатите грешки“.
Иако САД и Иран постигнаа рамковен договор за прекин на конфликтот, остануваат отворени повеќе прашања околу неговата имплементација. Меѓу нив е и режимот на пловидба низ Ормускиот Теснец.
Американскиот потпретседател Џеј Ди Венс изјави дека Вашингтон очекува теснецот долгорочно да остане отворен без транзитни такси, но призна дека деталите допрва ќе се договараат во техничките преговори.
Од иранска страна, пак, беше појаснето дека нема да се наплаќаат транзитни давачки, туку надоместоци за навигациски услуги, заштита на животната средина, осигурување на бродовите и други поморски услуги.
Според претходни информации на „Ројтерс“, нацрт-договорот предвидува повторно отворање на Ормускиот Теснец, укинување на американската блокада на иранските пристаништа и продолжување на примирјето, додека разговорите за иранската нуклеарна програма би продолжиле уште 60 дена.
