Во услови на ново заострување на состојбата на Блискиот Исток, Иран остро ги осуди најновите израелски напади врз Либан и ги обвини Соединетите Американски Држави за последиците од, како што наведува, повтореното прекршување на договорите за прекин на огнот.
Во соопштение објавено на платформата Телеграм, портпаролот на иранското Министерство за надворешни работи, Есмаил Багаеи, ги осуди, како што ги нарече, „агресивните и терористички напади“ на Израел врз повеќе подрачја во Либан.
Според Багаеи, во нападите загинале и биле повредени десетици либански цивили, а причинета е и значителна материјална штета врз станбени објекти и инфраструктура. Тој предупреди дека продолжувањето на израелската ескалација може да има сериозни и непосредни последици врз мирот и безбедноста во регионот.
Иранскиот претставник истакна дека Вашингтон носи „директна одговорност“ за актуелната состојба. Притоа се повика на член 1 од Меморандумот за разбирање потпишан на 18 јуни, во кој, според него, јасно е наведено дека завршувањето на војната во Либан претставува составен дел од поширокиот договор за прекин на огнот на сите фронтови.
Багаеи додаде дека Иран ќе ги преземе сите неопходни мерки за заштита на своите интереси, безбедноста и правата на своите сојузници.
Во меѓувреме, либанската државна новинска агенција објави дека во серија израелски напади врз јужниот и источниот дел на Либан во текот на денот загинале најмалку 31 лице, додека повеќе други се повредени.
Според најновите официјални податоци, од почетокот на израелската воена офанзива во Либан на 2 март досега загинале 3.912 лица, повредени се 11.873, а повеќе од еден милион жители биле принудени да ги напуштат своите домови. За време на воените операции, израелските сили навлегле повеќе од десет километри во внатрешноста на либанската територија.
