Иран и САД мораат да излезат од состојбата „ниту војна ни мир“, изјави иранскиот претседател

Иранскиот претседател Масуд Пезешкијан порача дека Техеран и Вашингтон мора да најдат излез од сегашната состојба на долготрајни тензии, оценувајќи дека односите „ниту војна, ниту мир“ повеќе не се одржливи.

— реклама —

Како што пренесе полуофицијалната иранска новинска агенција „Мехр“, Пезешкијан истакнал дека е неопходно да се дојде до политичко решение и дека преговорите се единствениот пат напред.

„Ако сакаме да излеземе од состојбата ниту војна, ниту мир, што треба да направиме? Ако не разговараме, која е алтернативата?“, праша иранскиот претседател.

— реклама —

Тој додаде дека токму врз таа основа врховниот лидер на Иран дал согласност за продолжување на разговорите, испраќајќи јасна порака: „Одете и решете го прашањето“.

— реклама —

Од примирјето што стапи во сила на 8 април, Техеран континуирано ги обвинува Израел и САД за нарушување на договорените услови. Според иранските власти, Вашингтон изведувал напади врз ирански цели и во периодот кога се воделе индиректни преговори, додека Израел продолжил со интензивните операции во Либан и покрај ограничувањата предвидени со договорот.

Во меѓувреме, американскиот претседател Доналд Трамп во повеќе наврати тврдеше дека договор со Иран е на дофат, но засега нема конкретни показатели дека разговорите довеле до значителен напредок.

— реклама —

Изјавата на Пезешкијан доаѓа во момент на засилени регионални тензии и растечки меѓународни повици за враќање на дипломатијата како средство за спречување на поширока ескалација на конфликтот.