Иран и САД добиле план за ставање крај на непријателствата кој би можел да стапи во сила во понеделник и повторно да го отвори Ормускиот теснец, објави денес Ројтерс, повикувајќи се на неименуван извор запознаен со предлогот.
Според наводите на изворот, Пакистан изработил рамка за завршување на непријателствата и ја доставил до Иран и САД во текот на изминатата ноќ, наведувајќи двофазен пристап со итен прекин на огнот, по што би следел сеопфатен договор.
„Сите елементи мора да бидат договорени денес“, изјавил изворот, додавајќи дека почетниот договор ќе биде структуриран како меморандум за разбирање финализиран по електронски пат преку Пакистан, единствениот комуникациски канал во преговорите.
Аксис претходно, повикувајќи се на американски, израелски и регионални извори, објави дека САД, Иран и регионалните посредници разговараат за потенцијален 45-дневен прекин на огнот како дел од двофазен договор што би можел да доведе до траен крај на војната.
Изворот изјавил за Ројтерс дека началникот на пакистанската војска, Асим Мунир, бил во контакт „целата ноќ“ со потпретседателот на САД Џеј Ди Венс, специјалниот пратеник Стив Виткоф и иранскиот министер за надворешни работи Абас Аракчи.
Според предлогот, прекинот на огнот би стапил во сила веднаш, би се отворил Ормускиот теснец, со рок од 15-20 дена за финализирање на пошироко решение.
Договорот, неформално наречен „Исламабадски договор“, би вклучувал регионална рамка за теснецот, со завршни лични разговори во Исламабад.
Иранските претставници претходно изјавија за Ројтерс дека Техеран бара траен прекин на огнот со гаранции дека нема повторно да биде нападнат од САД и Израел.
Беше наведено дека Иран примил пораки од посредници, вклучувајќи ги Пакистан, Турција и Египет.
Се очекува конечниот договор да вклучува обврска на Техеран дека нема да тежнее кон нуклеарно оружје, во замена за олеснување на санкциите и одмрзнување на имотот, изјавил изворот.
Два пакистански извори изјавиле дека Иран сè уште не се обврзал и покрај интензивираните активности.
„Иран сè уште не одговорил“, рекол еден извор, додавајќи дека предлозите поддржани од Пакистан, Кина и САД за привремен прекин на огнот досега не довеле до прифаќање на обврски.
