Иран им се закани на Американците со промена на тактиката: Од одбранбена преминува во офанзивна политика

Иран ја менува својата политика од одбранбена во „целосно офанзивна“, откако застојот во обидите за постигнување траен договор за завршување на војната со САД продолжува, изјавил висок ирански претставник за „Ројтерс“.

Преговорите за постигнување мировен договор, како и напорите за повторно воспоставување на транспортот на нафтените танкери низ стратешки важниот Ормуски Теснец, целосно запреле. Според иранскиот претставник, Техеран е подготвен за ескалација доколку дипломатијата не даде резултат.

— реклама —

„Иранските субјекти мора да бидат подготвени за ескалација на тензиите во Ормускиот Теснец и поширокиот регион, бидејќи Иран ќе биде подготвен да носи одлуки и да презема тешки мерки“, изјавил тој за „Ројтерс“.

Тој додал дека Техеран ќе изврши „навремен и прецизен“ воен напад со цел да ја пробие американската поморска блокада доколку дипломатските напори пропаднат.

— реклама —

Денес истекол рокот во кој Иран и САД требало да постигнат конечен договор според меморандумот за разбирање постигнат во јуни. Меморандумот, потпишан на 17 јуни, предвидувал рок од 60 дена, со можност за продолжување со согласност на двете страни.

Целта била Вашингтон и Техеран да постигнат поширок договор, вклучително и за иднината на иранската нуклеарна програма. Со меморандумот бил прогласен и прекин на воените операции, но договорот набрзо почнал да се распаѓа поради спорот околу контролата врз Ормускиот Теснец.

Техеран тврди дека петтата точка од меморандумот му дава право да управува со пловниот пат, додека Вашингтон го отфрла таквото толкување. Во меѓувреме, двете страни ја заостриле реториката.

— реклама —

„Во краткиот рок од неколку недели што го одреди Иран, САД мора да ги спроведе сите одредби од договорот. Тоа е предуслов за продолжување на преговорите со САД“, изјавил иранскиот претставник.

Според него, посредниците ќе го пренесат иранскиот рок до Вашингтон и до земјите во регионот.

Во изминатата недела и Иран и САД ја засилиле воената реторика. Американскиот претседател Доналд Трамп претходно предупреди дека Американците треба да се подготват за продолжување на високите цени на горивата како последица од војната.

Трамп денеска повторно порача дека главна цел е Иран „на никаков начин и во никаков облик“ да не поседува нуклеарно оружје.