Иран ѝ испрати предупредување на Америка: Нов напад може да предизвика нова војна

Претседателот на иранскиот парламент, Мохамед Багер Калибаф, ја предупреди администрацијата во Вашингтон дека евентуална нова воена акција против Иран може да предизвика нова војна, од која САД потешко би можеле да најдат излез.

— реклама —

Калибаф изјави дека Иран веќе одговорил на САД со, како што го оцени, „силен и разумен одговор“, додавајќи дека сега од Вашингтон зависи дали ќе спречи избувнување на нов конфликт. Тој истакна дека Иран е во највисока состојба на одбранбена готовност.

— реклама —

Според него, доколку САД повторно направат стратешка грешка, иранскиот воен и стратешки одговор на евентуален напад ќе биде непредвидлив и нема да биде ограничен на одредена географска област. Тој додаде дека претходните два воени судира покажале дека е завршена ерата на потценување на Иран, нагласувајќи дека националното единство е клучно за одвраќање на заканите.

Осврнувајќи се на внатрешната состојба, Калибаф предупреди дека поскапувањата и нестабилните цени дополнително ги оптоваруваат домаќинствата. Тој побара од владата и надлежните институции да ја засилат контролата врз снабдувањето и цените, посочувајќи дека недоволниот надзор им овозможува на трговците и посредниците да ги злоупотребуваат воените околности.

— реклама —

Тој ги посочи и долгите колони камиони на граничните премини, особено на северозападот и југоистокот на Иран, каде што чекањата траат со денови, па и со недели. Според него, тоа им штети на извозот и трговскиот углед на земјата, поради што побара парламентарните комисии и надлежните министерства итно да предложат решенија.

— реклама —

Калибаф порача дека по завршувањето на актуелната парламентарна седница приоритет треба да бидат економските проблеми и мерките за нивно решавање.