Иран: Нема нов договор со САД додека продолжуваат заканите

Иран нема да започне преговори за конечен мировен договор со Соединетите Американски Држави доколку продолжат заканите со употреба на сила, порача иранскиот министер за надворешни работи, Абас Арагчи.

Во објава на социјалната мрежа Икс, Арагчи потсети на одредбите од меморандумот за разбирање што минатиот месец го потпишаа Техеран и Вашингтон, нагласувајќи дека документот јасно предвидува дека разговорите за конечен договор не можат да започнат додека траат заканите.

— реклама —

„Членот 13 од меморандумот е јасен – преговорите за конечен договор нема да почнат ако продолжат заканите. Почитувајте го вашиот потпис“, напиша Арагчи.

— реклама —

Меморандумот, кој беше постигнат со посредство на Пакистан и потпишан електронски од иранскиот претседател Масуд Пезешкијан и американскиот претседател Доналд Трамп, стапи во сила на 18 јуни. Документот со 14 точки предвидува 60-дневен период на индиректни разговори меѓу двете земји со цел постигнување траен мировен договор.

Изјавата на шефот на иранската дипломатија следува откако Трамп порача дека САД се подготвени да употребат воена сила доколку дипломатските напори не дадат резултат, повторувајќи дека Иран никогаш не смее да развие нуклеарно оружје.

— реклама —

„Или ќе постигнеме договор или ќе ја завршиме работата. Тоа нема да биде тешко. Сепак, повеќе би сакал договор, затоа што не сакам да влијаам врз 91 милион луѓе“, изјави Трамп во Белата куќа.

Дополнителни тензии предизвика и изјавата на израелскиот министер за одбрана, Израел Кац, кој предупреди дека Израел ќе го „спречи“ секој иден ирански лидер што ќе се обиде да ја нападне неговата земја.

Во својата објава, Арагчи сподели и фотографии од масовната погребна поворка во Техеран за убиениот врховен лидер, Али Хамнеи, кој беше ликвидиран на 28 февруари, на првиот ден од американско-израелската воена операција против Иран.