Иран: Нема нови директни мировни преговори со САД без промена на нивните барања

Иран нема да учествува во нови директни мировни преговори со Соединетите Американски Држави сѐ додека Вашингтон не ги промени своите „максималистички“ барања, изјави заменик-министерот за надворешни работи на Иран, Саид Хатибзаде.

— реклама —

Американска и иранска делегација минатиот викенд се сретнаа во пакистанскиот главен град Исламабад, но разговорите траеле помалку од еден ден и не бил постигнат договор.

Белата куќа претходно соопшти дека втор круг разговори најверојатно би можел повторно да се одржи во истиот град, при што Пакистан има важна посредничка улога меѓу двете земји.

— реклама —

Сепак, Хатибзаде истакна дека Техеран бара најпрво да се финализира „рамковен договор“ пред да се согласи на нова средба.

— реклама —

„Сè уште не сме стигнале до фаза во која можеме да одиме на нов состанок, бидејќи постојат прашања во кои Американците сè уште не се откажале од своите максималистички позиции“, изјави тој за Associated Press на дипломатски форум во Турција.

Тој додаде дека во последните денови имало бројни разменети пораки меѓу двете страни.

Иранскиот претставник нагласи и дека земјата нема да го предаде својот збогатен ураниум на САД, оценувајќи ја таа идеја како „неприфатлива од самиот почеток“.