Иран: Нема повлекување, вооружените сили се подготвени

Иранските вооружени сили се на „највисоко ниво на готовност“ додека примирјето со САД останува крајно неизвесно, изјави портпаролот на иранската армија Мохамад Акрами Нија.

Тој изјави дека морнарицата на Корпусот на чувари на исламската револуција го контролира западниот дел од Ормускиот Теснец, додека редовната морнарица е задолжена за источниот дел.

— реклама —

„Иранската армија го спречи непријателот да оствари која било цел, а по оваа војна повеќе нема повлекување“, порача генералот.

Акрами Нија тврди и дека американска воена опрема била уништена во бази низ Блискиот Исток, без да изнесе детали.

— реклама —

Во меѓувреме, италијанскиот министер за одбрана Гвидо Крозето најави дека Италија ќе распореди два брода за деминирање поблиску до Персискиот Залив за побрза реакција доколку се создадат услови за обезбедување на Ормускиот Теснец.

— реклама —

Крозето изјави дека бродовите прво ќе бидат распоредени во источниот Медитеран, а потоа и во Црвеното Море, како превентивна мерка.

Тој додаде дека за каква било италијанска воена мисија во Ормускиот Теснец ќе биде потребно одобрение од парламентот.

Според Крозето, околу 40 држави размислуваат да се приклучат на потенцијална меѓународна мисија за обезбедување на теснецот, додека 24 веќе начелно изразиле подготвеност за учество.

Францускиот претседател Емануел Макрон најави нова иницијатива во Обединетите нации за создавање рамка за идна меѓународна мисија во Ормускиот Теснец.