Иран: Ормускиот теснец останува затворен додека траат американските закани

Иранската Револуционерна гарда соопшти дека Ормускиот Теснец нема повторно да биде отворен сè додека продолжуваат, како што наведува, заканите од Соединетите Американски Држави и нивното мешање во поморскиот сообраќај во регионот.

„Ормускиот Теснец не може повторно да биде отворен додека продолжуваат заканите и запаливата реторика на американските претставници, како и нивното мешање во поморскиот сообраќај во регионот“, се наведува во соопштението на Револуционерната гарда.

— реклама —

Техеран тврди дека строго го контролира влезот и излезот од Ормускиот Теснец, една од најважните светски поморски рути за транспорт на нафта и природен гас. Од друга страна, американската војска ги отфрла овие тврдења и наведува дека трговските бродови и понатаму поминуваат низ теснецот со поддршка на американските сили.

Според иранските власти, во текот на ноќта, два танкера се обиделе да поминат низ јужниот дел на Ормускиот Теснец по рута што Иран ја смета за небезбедна. Револуционерната гарда тврди дека двата брода се повлекле откако на едниот избувнал голем пожар, но причината за инцидентот не е позната, ниту пак има независна потврда за овие информации.

— реклама —

„Ормускиот Теснец е наша територија и морнарицата на Револуционерната гарда цврсто го контролира. Нема да дозволиме сили кои доаѓаат од илјадници километри далеку да се мешаат“, порачаа од иранската гарда.

Во меѓувреме, Централната команда на САД (ЦЕНТКОМ) соопшти дека започнала нов бран воздушни напади врз десетици цели на Револуционерната гарда, меѓу кои командни центри и воена инфраструктура. Вашингтон наведува дека нападите се одговор на претходните ирански ракетни напади врз американските сили на Блискиот Исток.

— реклама —

Претходно, Иран лансираше балистички ракети кон американска база во Јордан, но, според американски и јордански официјални лица, сите ракети биле пресретнати и немало жртви.

Во последните недели, американските сили извршија повеќе напади врз ирански поморски објекти, системи за противвоздушна одбрана, како и позиции со ракети и беспилотни летала. Според ЦЕНТКОМ, целта е да се намалат капацитетите на Иран за напади врз трговските бродови.

Иран и САД имаат спротивставени ставови за статусот на Ормускиот Теснец. Додека Техеран инсистира дека низ него можат да поминуваат само бродови со иранско одобрение, Вашингтон нагласува дека станува збор за меѓународен пловен пат кој не смее еднострано да биде затворен или контролиран.

Новото заострување на односите доаѓа по краток период на затишје и обиди за продолжување на преговорите меѓу Вашингтон и Техеран со цел да се обезбеди слободна пловидба низ Ормускиот Теснец и да се намалат тензиите во регионот.