Иран подготвен за разговори, но не им верува на САД

Иран е подготвен да учествува во преговори доколку тоа биде неопходно, но не им верува на Соединетите Американски Држави и на нивните ветувања, изјави заменик-претседателот на иранскиот парламент Моџтаба Никзад, пренесе агенцијата Тасним.

— реклама —

„Погрешно е да се тврди дека само се бориме и не преговараме. Се придржуваме до црвените линии поставени од врховниот лидер. Ако биде потребно, ќе преговараме, но на Американците и на нивните ветувања не им веруваме“, изјавил Никзад.

Тој ги обвини САД за, како што рече, сериозни злосторства против Иран, посочувајќи ги ракетните напади насочени кон ирански нуклеарни научници, како и нападот врз основното училиште „Шаџарех Тајебех“ во Минаб, во провинцијата Хормозган.

— реклама —

Според иранските власти, во тој напад загинале повеќе од 170 ученици, наставници и членови на персоналот.

— реклама —

Никзад ги отфрли и тврдењата на странските медиуми дека во Иран има недостиг на храна и сериозни проблеми предизвикани од воените случувања. Тој истакна дека за време на конфликтот околу седум милиони луѓе биле раселени во други делови на земјата, но нагласи дека владата успеала да обезбеди непречено снабдување со основни производи и сместување.

Во меѓувреме, иранската агенција Тасним пренесе и изјава од челникот на правосудството, кој нагласил дека меѓу иранските државни претставници нема несогласувања околу ставот дека „на непријателот не смее да му се попушти ниту за еден милиметар“.

Изјавите доаѓаат во период на зголемени тензии на Блискиот Исток и засилени дипломатски активности поврзани со можните идни разговори меѓу Техеран и Вашингтон.