Иран поставува услови за Ормутскиот теснец: „Ќе одлучува состојбата на терен, не социјалните мрежи“

Иран поставува нови услови за користење на Ормутскиот теснец, испраќајќи јасна порака дека контролата врз една од најважните светски нафтени рути ќе зависи од развојот на ситуацијата на терен, а не од јавните изјави или притисоци.

Претседателот на иранскиот парламент и шеф на преговарачката делегација, Мохамад Багер Галибаф, остро ги отфрли изјавите на американскиот претседател Доналд Трамп, оценувајќи дека „изнесол седум тврдења за еден час, од кои сите биле лажни“.

— реклама —

„Нема да победат со лаги, ниту ќе постигнат нешто во преговорите“, изјави Галибаф.

Во однос на Ормутскиот теснец, тој порача дека евентуалното продолжување на американската поморска блокада директно ќе влијае врз слободата на пловидба.

— реклама —

„Ако продолжи блокадата, теснецот нема да остане отворен. Пловидбата ќе се одвива по одредени рути и со иранско одобрување. Дали ќе биде отворен или затворен ќе зависи од реалната состојба, а не од социјалните мрежи“, рече Галибаф.

— реклама —

Изјавите од Техеран се разликуваат и по нијанси. Додека министерот за надворешни работи Абас Арагчи најави дека теснецот ќе остане отворен за комерцијални бродови, воени извори посочуваат дека нема да биде дозволен за воени пловила.

Според информации од ирански извори, се разгледува и можноста теснецот да остане отворен само во периодот на примирјето, кое трае уште неколку дена, како и воведување на строго контролирани поморски рути.

Иранската Револуционерна гарда веќе објави мапа со нови пловни коридори кои минуваат блиску до иранскиот брег, што укажува на намерата за воспоставување нов режим на управување со теснецот.

Овој пристап се толкува како обид Ормутскиот теснец да се искористи како силен преговарачки адут, вклучително и можност за воведување такси за премин, со што Иран би вршел дополнителен притисок во актуелната геополитичка криза.