Иран наводно разгледува можност за проширување на конфликтот надвор од Блискиот Исток, вклучително и потенцијални напади врз американски воени цели на европско тло, доколку Вашингтон дополнително го заостри конфликтот. Според извори блиски до иранскиот режим за „Фајненшл тајмс“, Техеран веќе ги проценувал можностите за одмазднички удари врз цели во Југоисточна Европа.
Меѓу потенцијалните цели се споменува Бугарија, која минатиот месец одобри користење на воздухопловната база Безмер за американски авиони-танкери. Како можна цел се наведува и Кипар, каде што се наоѓа британска воена база.
Изворите тврдат дека иранските сили разгледувале и можности за саботажа на подводните оптички кабли во Ормускиот Теснец, доколку дојде до дополнителна ескалација.
Заканите доаѓаат во период кога дипломатските напори за постигнување договор околу стратешки важниот Ормуски Теснец се во застој. Американскиот претседател Доналд Трамп неодамна порача дека со Техеран нема разговори, ниту се планирани.
Во исто време, иранската Револуционерна гарда се заканува дека во случај на нова војна би можела да ги прошири нападите и надвор од Блискиот Исток. Иран претходно предупреди дека секоја база од која би бил извршен напад врз иранска територија би можела да биде сметана за легитимна цел.
Сепак, воените аналитичари оценуваат дека можноста Иран сериозно да ги погоди оддалечените цели во Европа е ограничена. Експертите посочуваат дека иранските ракети со среден дострел имаат ограничувања кога станува збор за прецизноста и разорната моќ на големи далечини.
Според изворите на „Фајненшл тајмс“, евентуалната реакција на Техеран ќе зависи од понатамошните потези на Вашингтон. Еден од нив предупредува дека, доколку САД преземат директни напади врз иранската инфраструктура, Иран би можел да се обиде да го прошири конфликтот и кон Европа.
Во анализите, сепак, се оценува дека за Иран поефикасна опција би било дејствувањето преку сојузнички вооружени групи во Ирак, Либан и Јемен, наместо директни ракетни напади врз далечни европски цели.
Во Техеран, според извештаите, постојат и поделби околу тоа колку Иран навистина може да издржи во директен конфликт со САД. Додека дел од претставниците предупредуваат дека земјата може да ги прецени сопствените способности, тврдокорната струја смета дека Вашингтон мора да претрпи сериозна штета за да биде принуден да ги почитува идните договори.
