Иран со нови напади во Ормутскиот теснец, закани и кон Европа

Иран започна нов бран напади врз бродови во Ормутскиот теснец и цели во Обединетите Арапски Емирати, додека тврдолинијашките кругови во Техеран упатија закани дека европските воени бази би можеле да станат легитимни цели.

— реклама —

Според Euronews, клучните одлуки ги носи Корпусот на чуварите на исламската револуција, кој претставил нов план за транзит низ теснецот под свои услови, со што би се проширила нивната зона на контрола и надвор од самата морска теснина.

Тензиите дополнително ескалираа по американската операција „Проект Слобода“, иницирана од Доналд Трамп. Американската војска соопшти дека уништила повеќе ирански пловила, додека CENTCOM потврди дека се расчистуваат морски мини и се воспоставува заштитен „одбранбен чадор“ за трговските бродови.

— реклама —

Во меѓувреме, властите на Обединетите Арапски Емирати соопштија дека пресретнале повеќе балистички и крстосувачки ракети, како и беспилотни летала лансирани од Иран, додека дел од нападите погодиле и цели во регионот.

— реклама —

Дополнителна загриженост предизвикаа изјавите на иранскиот тврдолинијаш Хосеин Шариатмадари, кој предупреди дека европските земји што ќе ги поддржат САД би можеле да се соочат со директни напади.

Во исто време, претседателот на иранскиот парламент Мохамад-Багер Галибаф порача дека „Иран сè уште не започнал“, нагласувајќи дека сегашната состојба е неодржлива за Вашингтон.

Теренските извештаи укажуваат и на растечки немири во јужен Иран, со пријави за пожари, експлозии и проблеми со интернетот, иако дел од тие информации не се независно потврдени.