Иран: Војната ќе трае до целосен пораз на непријателот

Иранските вооружени сили најавија дека војната против САД и Израел ќе продолжи сè додека, како што наведуваат, непријателот не биде целосно поразен, директно доведувајќи ги во прашање изјавите на Доналд Трамп дека конфликтот може да заврши за неколку недели.

Во соопштение пренесено од иранската агенција, портпарол на војската испрати јасна порака за натамошна ескалација.

— реклама —

„Војната ќе продолжи до предавање на непријателот и негово трајно каење“, изјави портпарол на иранската војска.

„Можеме да изведеме уште поразорни, пошироки и посилни напади против САД и Израел“, додаде портпаролот на иранската војска.

— реклама —

Овие изјави доаѓаат откако Трамп во обраќање до нацијата повторно најави дека конфликтот би можел да заврши во рок од две до три недели, без притоа да понуди конкретен план за тоа како би се постигнало.

Во истото обраќање, американскиот претседател упати и закани кон Иран.

— реклама —

„Ќе го вратиме Иран во камено доба“, изјави Доналд Трамп.

Судирот меѓу САД, Израел и Иран, кој трае од крајот на февруари, веќе сериозно ја дестабилизира ситуацијата на Блискиот Исток. Нападите се проширија од воени цели и инфраструктура кон трговски бродови и енергетски капацитети.

Особено погоден е Ормутски теснец, каде што заканите и нападите речиси целосно го запреа поморскиот сообраќај, што доведе до раст на цените на енергенсите и дополнителна нестабилност на глобалните пазари.

И покрај сигналите за можни преговори, реториката од двете страни укажува дека конфликтот влегува во фаза на продлабочување, со сериозни ризици од понатамошна ескалација.