Иранската гарда: Американската војска ќе плати висока цена за агресијата

Иранската Револуционерна гарда (IRGC) соопшти дека ноќешните напади во Персискиот Залив биле одговор на, како што тврди, претходни американски воени дејствија и порача дека акциите треба да послужат како „лекција“ за Соединетите Американски Држави.

Во соопштението на Гардата се наведува дека американските сили први ја започнале ескалацијата со напад врз ирански нафтен танкер во близина на Ормутскиот Теснец.

— реклама —

„Синоќа доцна, агресивната американска војска со воздушен проектил погоди ирански нафтен танкер во близина на Ормутскиот Теснец и ја оштети машинската просторија на бродот“, се наведува во соопштението.

Според Техеран, како одговор на тој напад, морнарицата на Иранската Револуционерна гарда со проектили го гаѓала бродот „Panaya“, кој го опишува како „американско-ционистичко пловило“.

— реклама —

Иранските власти тврдат дека американските сили потоа нападнале комуникациска кула на Гардата на островот Кешм, по што следувал нов ирански одговор.

— реклама —

„Воздушно-космичките сили на IRGC извршија ракетни и беспилотни напади врз нивна воздушна и хеликоптерска база во една од земјите во регионот, како и врз седиштето на Петтата флота на САД“, се наведува во соопштението.

На крајот од пораката, Иранската Револуционерна гарда упати директно предупредување до Вашингтон.

„Веќе предупредивме дека секој чин на агресија ќе наиде на поинаков и посилен одговор, а токму така и постапивме. Овие одговори треба да послужат како лекција“, порачаа од Гардата.

Во соопштението се додава и дека секое нарушување на безбедноста во Ормутскиот Теснец ќе има висока цена за американските сили во регионот.