Иран соопшти дека неговите пристаништа се подготвени да обезбедат поморски услуги, техничка поддршка, снабдување и медицинска помош за бродови што ќе се најдат во проблеми во Ормутскиот теснец.
Известувањето е испратено до капетаните на трговските бродови што пловат во регионот на Персискиот Залив, пренесе иранската државна новинска агенција IRNA.
Во пораката на Иранската организација за пристаништа и поморство се наведува дека сите пловила што минуваат низ територијалните води, а особено оние што се наоѓаат во иранските води и пристаништа, ќе можат да користат услуги за снабдување со гориво, медицинска помош и материјали за одржување.
Поморската агенција соопшти дека пораката ќе биде емитувана преку комуникациските мрежи и VHF-системите во регионот трипати дневно во текот на следните три дена.
