Исландските граѓани на референдум со тесно мнозинство од 52 отсто го отфрлија продолжувањето на преговорите за пристапување кон Европската унија, со што земјата засега се откажа од можноста да стане членка на Унијата.
Одлуката претставува удар за владата на премиерката Кристин Фростадотир, која се залагаше за приближување и членство во ЕУ. Според анализите на германските медиуми, во кампањата против продолжувањето на преговорите особено влијаеле стравувањата на земјоделците од поголема конкуренција, но и прашањето за риболовот.
Како една од главните причини се посочува и влијанието на моќното рибарско лоби. Десетина големи компании уште од 1980-тите години контролираат голем дел од риболовните квоти во земјата, а неодамнешни истражувања покажале дека дел од нив вложиле значителни средства во кампања против приближувањето кон ЕУ.
Рибарската индустрија, според анализите, има и блиски односи со најголемиот дневен весник во Исланд, кој за време на кампањата бил силен глас против европската интеграција.
На крајот, според германските медиуми, стравот од губење на контролата врз националните ресурси и желбата за зачувување на суверенитетот надвладеале над аргументите на поддржувачите на членството. Тие сметаат дека влезот во ЕУ би донел поголема економска стабилност и дополнителна безбедност.
„Passauer Neue Presse“ оцени дека Исланѓаните ѝ „задале удар на Европската унија“, но додава дека одлуката не значи крај на европската интеграција.
Од друга страна, „Tageszeitung“ оценува дека одлуката не треба да се сфаќа лично во Европа, бидејќи Исланд традиционално ја цени својата независност, а како членка на Европската економска област веќе ги користи дел од придобивките поврзани со европскиот пазар.
„Neue Osnabrücker Zeitung“ беше покритичен кон ЕУ, оценувајќи дека Унијата повеќе не се доживува како некогаш и дека аргументот за единствениот пазар не е доволен за да ги убеди граѓаните. Весникот предупредува и на перцепцијата за ЕУ како бирократска и прекумерно регулирана заедница.
„Volksstimme“ оцени дека кај Исланѓаните „поблиска е националната кошула отколку европскиот капут“, посочувајќи дека риболовот е клучен за нивната економија, додека строгите европски правила и квоти за улов се непопуларни во рибарскиот сектор.
„Süddeutsche Zeitung“, пак, смета дека самото одржување на референдумот било грешка и го споредува случајот со референдумот за Брегзит во Велика Британија.
