Италијанка загина во сообраќајна несреќа, се истражува нејзиниот поранешен партнер, кого претходно го пријавила за прогонување

Италијанските истражители проверуваат дали смртоносната сообраќајна несреќа во која загинала 69-годишна жена била намерно предизвикана од нејзиниот 73-годишен поранешен партнер. Жената претходно го пријавила за прогонување, а нејзиното семејство бара да се утврдат сите околности на трагедијата, објави „Скај ТГ24“.

Несреќата се случила завчера наутро на обиколница во покраината Варезе, во Италија. Првичните сомнежи биле дека на жената ѝ се слошило додека возела, но понатамошната истрага отворила можност судирот да не бил случаен.

— реклама —

Според првичните наоди, 73-годишниот маж со својот „јагуар“ преминал во спротивната сообраќајна лента токму кога наишол автомобилот на жената. Лекарите од итната помош можеле само да ја констатираат нејзината смрт, додека мажот со хеликоптер бил пренесен во болница во Варезе поради повреди на нозете.

— реклама —

Двојката била во осумгодишна врска, која жената ја прекинала во јуни годинава. Според нејзиното семејство и адвокатката, мажот тешко го прифатил раскинувањето, а наводно имало закани, расправии и следење.

Адвокатката на починатата, Чинција Бота, потврдила дека мажот бил пријавен кај надлежните органи кон крајот на јули. Таа навела дека во деновите пред несреќата го подготвувале поднесокот до обвинителството со кој требало подетално да се образложат обвинувањата против него.

— реклама —

Еден од синовите на починатата изјавил дека поранешниот партнер ја прогонувал, ја чекал и ја следел, а за тоа, како што тврди, постојат и видеоснимки. По смртта на мајка им, синовите ги известиле истражителите за претходните инциденти.

„Синовите на госпоѓа Буфон сакаат да ја дознаат вистината и инсистираат случајот да биде истражен до крај“, изјавила адвокатката.

Локалната полиција во Касано Мањаго извршила нов увид за да го реконструира судирот и да ги утврди точните околности. Против 73-годишниот маж се води истрага под сомнение за предизвикување смрт во сообраќајот, а се проверува и можноста судирот да бил намерно предизвикан.