Израелскиот министер за надворешни работи Гидеон Саар изјави дека Израел практично ја добил војната со Иран, но нагласи дека не може да се предвиди кога ќе заврши конфликтот.
На прес-конференција, Саар истакна дека воената кампања ќе продолжи сѐ додека не се исполнат поставените цели.
„Потребно е трпение. Веќе победивме, но ќе продолжиме додека мисијата не биде завршена“, изјави Саар, додавајќи дека Иран е „драматично ослабен“ и дека ситуацијата во регионот веќе не е иста како пред почетокот на конфликтот.
Тој нагласи дека главната цел на Израел е отстранување на, како што рече, „егзистенцијалните закани“, без да прецизира како ќе се утврди дека тие цели се постигнати.
Според израелските власти, операциите вклучуваат воздушни напади врз лансери на балистички ракети, складишта и производствени капацитети, како и цели поврзани со иранската нуклеарна програма и безбедносните структури.
И покрај ваквите тврдења, Иран и натаму изведува ракетни напади врз Израел, што укажува дека неговите воени капацитети не се целосно неутрализирани.
Конфликтот трае повеќе од две недели и однесе над 2.000 животи, најмногу во Иран и Либан, но и во Израел, Ирак и други делови од регионот.
Во меѓувреме, кризата се продлабочува и на регионално ниво. Израел е вклучен и во судири со Хезболах во Либан, додека Иран изведува напади врз земји од Заливот. Дополнително, блокадата на Ормутскиот теснец предизвикува сериозни последици врз глобалните пазари на енергенси.
Саар ја оцени блокадата како „современо пиратство“ и глобален проблем, додека дел од сојузниците на САД одбија да се вклучат во воени мисии за обезбедување на пловниот пат, барајќи појаснување на стратегијата и целите.
