Израелска компанија користела онлајн реклами за шпионирање телефони, погодени и страници на ЕУ и НАТО

Израелска технолошка компанија наводно користела онлајн реклами за да овозможи тајно следење и потенцијално заразување мобилни телефони со шпионски софтвер. Реклами поврзани со оваа операција биле прикажувани и на официјални веб-страници на Европската Унија, НАТО и Обединетите нации, открива истрага на истражувачи за сајбер-безбедност.

Истражувањето го спровеле „Ситизен лаб“ при Универзитетот во Торонто и компанијата за сајбер-безбедност „Конфајант трет интелиџенс“. Тие откриле техника наречена „Адфекшн“ (AdFection), со која легитимните системи за онлајн рекламирање биле злоупотребени за потребите на надзорот.

— реклама —

„Вклучувањето во екосистемот на онлајн рекламите ѝ обезбедува на платеничката индустрија за шпионски софтвер прикриен систем за испорака“, изјави Бил Марцак, виш истражувач во „Ситизен лаб“, оценувајќи дека откриените случаи се само мал дел од поширокиот проблем.

Истражувачите ги анализирале уредите на новинари и вработени во медиумската мрежа „Ал Џезира“. Утврдиле дека 45 уреди биле цел на напади, а некои биле заразени со израелски шпионски софтвер познат како „Кандиру“ (Candiru).

Во центарот на операцијата, според истражувањето, се наоѓа израелската компанија „Дискавер-тек“ (Discover-Tech), која се претставува како рекламна компанија. Нејзината платформа „Контролиум“ (Controlium), наводно, им овозможувала на операторите на комерцијален шпионски софтвер да идентификуваат, следат и таргетираат уреди преку реклами прикажани на веб-страници и во апликации.

— реклама —

Компанијата „Кандиру“, чиј софтвер бил поврзан со операцијата, во 2025 година била купена од „Интегрити лабс“ (Integrity Labs). Двете компании не одговориле веднаш на барањата за коментар.

Размерите на операцијата се значителни. Анализата на четири милијарди рекламни записи покажала дека рекламите на „Дискавер-тек“ се појавувале на речиси 200.000 веб-страници и мобилни апликации во десетици земји, во период од четири месеци. Меѓу нив биле и официјалните веб-страници на НАТО, Обединетите нации, Европскиот парламент, Европската комисија и Советот на ЕУ.

— реклама —

Техниката се потпира на системот за наддавање во реално време, кој автоматски се користи за продажба на рекламен простор и таргетирање корисници. Наместо жртвите да бидат наведени да кликнат на злонамерен линк, рекламите можат да послужат за идентификување и потенцијално заразување уреди без никаква активност од корисникот. Овој пристап е познат како напад „без кликнување“ (zero-click).

Според истражувачите, рекламите пренасочувале милиони уреди кон сервери поврзани со „Кандиру“. Сепак, тоа не значи дека сите тие уреди биле заразени со шпионски софтвер.

Откритијата предизвикаа повици за дополнителна истрага, особено поради можноста институциите на ЕУ да биле изложени на ваков вид надзор.

— реклама —

„Можноста институциите на ЕУ да биле изложени треба да вклучи аларм низ целиот Брисел“, изјави Хана Нојман, германска пратеничка во Европскиот парламент од групата на Зелените, која и самата претходно била цел на операција за сајбер-шпионажа спроведена од иранска хакерска група.

„Европа не може да тврди дека ја брани демократијата, додека истовремено ги остава сопствените демократски институции ранливи на шпионски софтвер“, порача Нојман.