Израел се соочува со најголем бран меѓународни бојкоти и санкции во својата историја, објави израелскиот весник „Једиот Ахронот“, оценувајќи дека земјата е погодена од „цунами од меѓународни санкции“ насочени кон владини функционери, доселеници и официјални институции.
Според весникот, по 7 октомври 2023 година значително се зголемил притисокот врз Израел, а движењето за бојкот, дезинвестирање и санкции (БДС) бележи успеси на повеќе полиња. Се наведува дека уметници одбиваат да настапуваат во Израел, автори не дозволуваат превод на нивните дела на хебрејски јазик, а се водат и кампањи за исклучување на Израел од настани како „Евровизија“ и натпреварувања под покровителство на ФИФА.
Весникот посочува дека Франција неодамна им забранила влез на израелскиот министер за финансии Безалел Смотрич и на министерот за национална безбедност Итамар Бен-Гвир, поради нивната поддршка за анексија на Западниот Брег и проширување на еврејските населби. На Франција ѝ се придружиле Ирска, Обединетото Кралство, Канада, Австралија, Нов Зеланд и Норвешка, кои вовеле ограничувања и санкции против израелски функционери и доселеници.
Во анализата се наведува и дека странските инвестициски фондови почнуваат да се повлекуваат од израелски компании, додека Советот за човекови права на Обединетите нации таргетира компании што работат во населбите на окупираниот Западен Брег и Источен Ерусалим.
„Једиот Ахронот“ оценува дека владата на премиерот Бенјамин Нетанјаху не успеала ефикасно да одговори на растечката меѓународна изолација и да ја намали поддршката за движењата што повикуваат на бојкот на Израел.
Во меѓувреме, Меѓународниот кривичен суд бара апсење на Нетанјаху поради обвиненија за воени злосторства и злосторства против човештвото, додека пред Меѓународниот суд на правдата се води постапка по тужбата на Јужноафриканската Република, која го обвинува Израел за геноцид во Газа.
