Израелскиот министер за надворешни работи Гидеон Сар изјави дека таа земја ефективно ја добила војната со Иран, но дека кампањата на воздушни напади ќе продолжи сè додека не се постигнат сите цели.
Сар, на заедничка прес-конференција со министерот за надворешни работи на Естонија Маргус Цакна, рече дека Израел настојува да ги отстрани „егзистенцијалните закани“, пренесува Ројтерс.
„Веќе победивме. Ова е јасно за нас и за нашите соседи, но ќе продолжиме додека мисијата не заврши“, изјави Сар.
Тој додаде дека Иран е „драматично ослабен“ и дека повеќе не е земјата каква што била пред почетокот на војната на 28 февруари, по заедничките американско-израелски напади.
Сар истакна дека режимот во Иран може да биде соборен само од иранскиот народ.
Говорејќи за иранската блокада на Ормускиот теснец, Сар оцени дека блокирањето на овој пловен пат, низ кој поминува околу 20 отсто од светската трговија со нафта, претставува „модерно пиратство“ и глобален проблем.
Министерот за надворешни работи на Естонија, Маргус Цакна, изјави дека членките на НАТО и Европската Унија се отворени за учество во мисија предводена од Соединетите Американски Држави за повторно отворање на овој стратешки пловен пат, но нагласи дека Вашингтон најпрво треба да ги разјасни своите цели и видот на поддршка што ја бара.
