Јапонија откри богато наоѓалиште на ретки земни минерали на дното на Тихиот Океан

Јапонската влада соопшти дека анализата на калта извадена од морското дно во близина на оддалечениот остров Минамиторишима во Тихиот Океан покажала висока концентрација на ретки земни минерали, при што дури 54 проценти од пронајдениот материјал го сочинуваат поретки и повредни елементи.

— реклама —

Истражувањето било спроведено по едномесечна мисија на јапонскиот брод за длабинско дупчење „Чикју“, кој во февруари успешно извлекол околу 50 тони кал од длабочина од околу шест километри. Тоа е прв успешен обид во светот за извлекување морско дно богато со ретки земни минерали од таква длабочина.

— реклама —

Во анализите е потврдено присуството на итриум, кој се користи во воздухопловната индустрија, енергетиката и производството на полупроводници, гадолиниум, кој има примена во магнетната резонанца и високите технологии, како и диспрозиум, важен за производството на магнети за електрични возила.

Јапонската влада засега не ја објавува проценетата големина на наоѓалиштето, оценувајќи дека досегашните истражувања не се доволни за прецизна процена.

— реклама —

Во февруари 2027 година Јапонија планира едномесечно пробно ископување во истото подрачје, при што дневно би се ваделе околу 350 тони кал. Материјалот ќе биде обработуван за да се тестираат технологиите за раздвојување, рафинирање и топење на ретките земни минерали.

Проектот е дел од стратегијата на Јапонија за намалување на зависноста од кинеските суровини, откако Кина во последните години воведе ограничувања за извозот на дел од ретките земни минерали и магнетите што се користат во автомобилската, електронската и одбранбената индустрија.