Претседателот на Јужна Кореја Ли Џае Мјунг изрази жалење поради летовите со дронови кон Северна Кореја, велејќи дека таквите постапки предизвикале непотребни воени тензии со Пјонгјанг.
Овие изјави ги даде на седница на владата, откако обвинителството минатата недела покрена обвинение против три лица осомничени дека испраќале дронови во Северна Кореја во периодот од септември до јануари, пренесува Јонхап. Меѓу обвинетите има постдипломец во триесеттите години, вработен во Националната разузнавачка служба и воен офицер.
„Иако ова не беше чин на нашата влада, изразувам жалење кон севернокорејската страна поради непотребните воени тензии предизвикани од вакво непромислено однесување“, изјави Ли.
Тој претходно повеќепати ги критикуваше ваквите упади со дронови, но ова е првпат директно да изрази жалење кон Северна Кореја.
Ли нагласи дека на цивилите им е забрането да преземаат неовластени активности кои би можеле да ја испровоцираат Северна Кореја, истакнувајќи дека дури и кога таквите акции се сметаат за неопходни за националната стратегија, тие мора да се спроведуваат со најголема претпазливост.
„Многу е жално што поединци самостојно извршиле вакви провокативни дејствија“, рече тој, оценувајќи ги како „неприфатливи“.
Ли, исто така, укажа на загриженоста кај жителите во пограничните области, додавајќи дека инцидентот предизвикал значителна вознемиреност.
„Мора внимателно да размислиме кому ваквите акции навистина му користат“, порача тој, повикувајќи ги надлежните институции да ги ревидираат правилата и да преземат мерки за спречување на вакви инциденти во иднина.
Тој ја истакна важноста на одговорната улога на Сеул во одржувањето на мирот и стабилноста на Корејскиот Полуостров.
Како што потсетува Јонхап, Ли од стапувањето на функцијата во јуни 2025 година се обидува да го продолжи дијалогот со Пјонгјанг, но Северна Кореја ги одбива тие понуди.
