Министерството за внатрешни работи денеска во Полициската академија во Идризово го промовираше Каталогот за континуирани обуки, изработен во соработка со Академијата и Мисијата на ОБСЕ во Скопје, со цел унапредување на професионалните капацитети на полициските службеници.
На промоцијата се обрати министерот за внатрешни работи Панче Тошковски, кој истакна дека каталогот претставува важна алатка за професионален развој и зајакнување на институционалните капацитети на Министерството.
„Континуираната обука и усовршување на полициските службеници претставуваат еден од нашите најважни приоритети. Каталогот не е само преглед на програмите за обука, туку и стратешка алатка за професионален развој, која ќе придонесе за зајакнување на институционалните капацитети, подобрување на квалитетот на полициското работење и дополнително унапредување на довербата на граѓаните во полицијата“, рече Тошковски.
Тој нагласи дека каталогот содржи систематизиран преглед на програмите за обука, подготвени според потребите на полициската служба, современите безбедносни стандарди и меѓународните практики. Обуките се насочени кон развој на стручните, оперативните и лидерските компетенции, со акцент на практичната примена на знаењата, почитувањето на човековите права, професионалниот интегритет и етичките стандарди.
Министерот упати благодарност до Полициската академија и Мисијата на ОБСЕ во Скопје за нивниот придонес во подготовката на каталогот, оценувајќи дека партнерската соработка е важен предуслов за создавање современ и одржлив систем за полициска обука.
Од Министерството за внатрешни работи посочуваат дека ќе продолжат со вложувања во знаењето, професионалноста и развојот на своите вработени, со цел изградба на модерна, ефикасна и доверлива полиција која ќе може успешно да одговори на современите безбедносни предизвици.
