Американската поп-ѕвезда Кејти Пери ќе настапи на свеченото отворање на Светското првенство 2026 во САД, а за публиката подготвува и посебно изненадување.
Пејачката откри дека на сцената на стадионот „СоуФај“ во Лос Анџелес ќе ја изведе песната „Wonder“ од нејзиниот албум „143“, објавен во 2024 година. Станува збор за композиција која досега никогаш не ја испеала во живо.
Посебен момент на настапот ќе биде присуството на младиот Норвежанец Тиус, кој својот дел од песната го снимил уште во 2021 година, кога имал само пет години.
„Тиус го сними својот дел за „Wonder“ кога имаше пет години. Сега има 10 години и доаѓа од Норвешка во Лос Анџелес за да ја изведе песната со мене на Светското првенство“, напиша Пери на социјалните мрежи.
Пејачката неодамна изјави дека изборот на песната не е случаен и дека совршено се вклопува во атмосферата на ваков глобален спортски спектакл.
Покрај Кејти Пери, на американската церемонија ќе настапат и Future, Anitta, LISA, Rema и Tyla, додека кантри-дуото Dan + Shay ќе ја изведе американската химна.
Светското првенство 2026, кое првпат се одржува во три земји – САД, Канада и Мексико – ќе собере 48 репрезентации и ќе трае до 19 јули. Церемониите на отворањето ќе бидат проследени со настапи на бројни светски музички ѕвезди низ Северна Америка.
