Клековски се сретна со повредените во „Пулс“, најавена долгорочна здравствена грижа

Министерот за здравство Сашо Клековски синоќа во Кочани разговарал со повредените во пожарот во „Пулс“ за нивната здравствена состојба и за понатамошната грижа и лекување што им се потребни по трагедијата од минатата година.

Клековски за средбата информираше преку својот официјален профил на Фејсбук, посочувајќи дека државата е подготвена да им помага на повредените и во подолг временски период.

— реклама —

На разговорот присуствувале и д-р Катерина Мирчовска и д-р Гордана Георгиева, членки на работната група при Министерството за здравство, задолжена за процена, советување, организација и следење на третманот на секој пациент. Според Клековски, ова е основа за здравствена грижа приспособена на индивидуалните потреби на повредените. На средбата бил и градоначалникот на Кочани, Владко Грозданов.

Средбата беше најавена минатата недела, по посетите на Клековски во Белград и во Софија, каде што разговарал со здравствените власти за натамошното лекување на дел од повредените. Засега не се соопштени конкретните договори и детали за продолжувањето на третманите.

Во пожарот во „Пулс“, кој се случи на 16 март 2025 година, беа повредени повеќе од 200 лица.

— реклама —

Во меѓувреме, Министерството за здравство соопшти дека Клековски и неговата бугарска колешка Катја Ивкова потпишале План за соработка меѓу министерствата за здравство на Македонија и Бугарија за периодот од 2026 до 2028 година.

Како приоритетни области се утврдени примарната и специјализираната медицинска заштита, болничкото лекување, превенцијата и контролата на заразните и незаразните болести. Соработката ќе опфати и епидемиолошки надзор, медицинска статистика, здравствен одговор при вонредни состојби, електронско здравство и други области од заемен интерес.

— реклама —

За време на посетата во Софија, Клековски и Ивкова ја посетиле и Универзитетската акушерско-гинеколошка клиника „Мајчин дом“, каде што ги пречекал директорот, проф. д-р Иван Костов.

Според информациите што ги објави министерот, клиниката е најголемата од овој вид во Бугарија, со околу 4.000 породувања и 10.000 гинеколошки интервенции годишно. Таа располага и со најголем оддел за предвремено родени бебиња во земјата, како и со десет операциски сали.

На средбата биле разгледани можностите за соработка во пренаталната дијагностика, неонаталниот скрининг, урогинекологијата, роботската гинеколошка хирургија и онкогинекологијата. Клековски посочил дека биле разгледани и можностите за размена на искуства во неонатологијата и роботската хирургија.