Клековски во Белград договорил соработка со српските здравствени установи

Министерот за здравство Сашо Клековски денеска престојуваше во работна посета на Белград, каде што се сретна со српскиот министер за здравство, д-р Златибор Лончар, и го посети Универзитетскиот клинички центар на Србија.

На средбата со Лончар, Клековски се заблагодари за помошта што Србија ја пружи уште во првите часови по трагедијата во Кочани. Двајцата министри разговараа и за продолжување на лекувањето на повредените од Кочани во српските здравствени установи, согласно претходната иницијатива.

— реклама —

Една од главните теми беше унапредувањето на соработката со референтните здравствени установи во Србија, со цел обезбедување високоспецијализирана здравствена заштита и зајакнување на капацитетите во Македонија.

Предвидена е соработка за упатување пациенти на лекување и специјализирана помош при сложени здравствени состојби, како и можности за добивање второ мислење и стручни консултации преку заеднички тимови. Разговорите опфатија и партнерства меѓу референтните центри во Србија и клиниките во Македонија, вклучувајќи практична обука, стручни престои и менторство за клиничките тимови.

— реклама —

Министрите разговараа и за дигитализацијата и поврзувањето на здравствените информациски системи, со вклучување на податоците од јавниот и приватниот сектор. Србија го користи и системот „Мој термин“, развиен во Македонија.

За време на посетата на Универзитетскиот клинички центар на Србија, најголемата здравствена установа во земјата, Клековски се сретна со в.д. директорката, проф. д-р Јелена Друловиќ.

— реклама —

На средбата беа разгледани можностите за соработка меѓу центарот и универзитетските клиники во Скопје, упатувањето пациенти со сложени состојби, заедничките стручни консултации и стручните престои за македонските клинички тимови.

Клековски и Друловиќ разговараа и за организациски прашања, по што ја посетија Клиниката за неврологија, со посебен акцент на згрижувањето пациенти со мозочен удар, како и Центарот за мултипла склероза.

„Целта не е нашите пациенти да патуваат подалеку, туку знаењето да дојде поблиску. Тоа што денес за сложените случаи го бараме надвор, со заеднички тимови, обуки и менторство утре треба да го имаме дома“, изјави Клековски.

За време на посетата, министерот беше придружуван од амбасадорот на Македонија во Србија, Никола Тупанчевски.