Македонија влегува во фаза на интензивен инфраструктурен развој со почетокот на реализацијата на еден од најголемите железнички проекти во земјата – изградба на брза железница долж Коридор 10, од границата со Србија до границата со Грција. Ова го истакна вицепремиерот и министер за транспорт Александар Николоски на Самитот на министрите за транспорт од земјите од Западен Балкан, кој се одржува во Солун.
На самитот, организиран од Секретаријатот на Транспортната заедница, се разговараше за инфраструктурните приоритети и инвестициските предизвици во регионот, а присуствуваше и еврокомесарот за одржлив транспорт и туризам, Апостолос Цицикостас.
Во своето обраќање Николоски нагласи дека модернизацијата и доизградбата на Коридор 10 претставуваат клучен предуслов за одржлив економски раст и поефикасно поврзување на земјите од Југоисточна и Централна Европа.
„Доколку паметно го искористиме Коридор 10, можеме целосно да ја трансформираме економијата во регионот. Веќе постои брза железница меѓу Атина и Солун, завршена е делницата Белград – Будимпешта, а Србија работи на правецот Белград – Ниш. Она што недостига е поврзувањето меѓу Ниш, Скопје и Солун. Затоа започнуваме амбициозен проект за изградба на брза железница по целата траса на Коридор 10 низ Македонија“, изјави Николоски.
Според најавите, патничките возови ќе се движат со брзина од 160 до 200 километри на час, додека товарните композиции ќе достигнуваат брзина до 120 километри на час. Проектот е проценет на најмалку две милијарди евра и треба да биде реализиран во рок од пет години.
Финансирањето, како што посочи Николоски, е обезбедено преку Договорот за стратешко партнерство со Обединетото Кралство.
„Со реализацијата на овој проект, патувањето од Скопје до Солун ќе трае само еден час и 25 минути, а од Скопје до Белград околу два и пол часа. Воедно, товарен воз од Атина до Виена ќе стигнува за помалку од 24 часа, а од Солун до Будимпешта за околу 12 до 14 часа. Тоа претставува целосно нова реалност за регионот и огромен поттик за економскиот развој“, нагласи Николоски.
Од Министерството за транспорт оценуваат дека проектот ќе придонесе за подобро регионално поврзување, забрзан транспорт на стоки и патници и зголемување на конкурентноста на македонската економија.
