Министерството за внатрешни работи подготвува законски измени со кои ќе се заострат правилата за користење електрични тротинети, а се разгледува и можноста за зголемување на старосната граница за нивно управување.
Ова го најави министерот за внатрешни работи Панче Тошковски за време на презентацијата на националниот проект „Прекинување на циклусот на насилство – системска превенција на семејно и врсничко насилство преку образовниот систем“, што се одржа во Владата.
Тошковски информираше дека пратеничката група на ВМРО-ДПМНЕ ќе достави предлог-измени на Законот за безбедност на сообраќајот на патиштата, изработени врз основа на анализи и препораки од експерти и стручните служби на Министерството.
„Ќе одиме со заострување на казнената политика и на регулативата во делот на управување со електрични тротинети, особено кај најмладите“, изјави Тошковски.
Според анализите на МВР, најголем број сообраќајни незгоди во кои учествуваат електрични тротинети се случуваат кај младите лица, најчесто на возраст до 17 и 18 години.
Министерот посочи дека честите прекршоци, како возење по двајца или тројца на еден тротинет, управување без заштитна кацига и непочитување на сообраќајните правила, се меѓу главните причини за сериозните последици во ваквите незгоди.
Во рамки на измените се разгледува и зголемување на минималната возраст за управување со електрични тротинети, со цел да се намалат ризиците и да се зголеми безбедноста во сообраќајот.
Тошковски се осврна и на проблемот со нелегалниот премин кај Бит-пазар, посочувајќи дека темата веќе е разгледувана на координациите меѓу МВР и Град Скопје и најави конкретни активности во наредниот период.
Тој нагласи дека покрај институционалните мерки, неопходна е и поголема одговорност од страна на граѓаните во почитувањето на сообраќајните правила и прописи.
