Криптогигантот Binance под закана да ја изгуби дозволата за работа во Европа

Неизвесноста околу иднината на најголемата светска криптоберза Binance во Европа се зголемува, откако се појавија информации дека компанијата би можела да остане без лиценца за работа во Европската унија.

Според информации на Ројтерс, барањето на Binance за добивање лиценца согласно со новите европски правила за криптоиндустријата, познати како MiCA, најверојатно ќе биде одбиено од грчкиот регулатор.

— реклама —

Новата регулатива предвидува сите криптокомпании што сакаат да работат на територијата на Европската унија да обезбедат официјална лиценца до крајот на јуни. Со добивањето лиценца во една земја-членка, компаниите добиваат пристап до целиот европски пазар.

Binance ја избра Грција како свое регулаторно седиште во Европа и таму поднесе барање за лиценцирање. Меѓутоа, според извори запознаени со процесот, постои голема веројатност грчките власти да не го одобрат барањето.

— реклама —

Доколку тоа се случи, криптоберзата би можела да го загуби правото да нуди услуги во сите 27 земји-членки на Европската унија.

— реклама —

Во последните години европските регулатори значително го заострија надзорот врз криптосекторот, настојувајќи да обезбедат поголема заштита на инвеститорите и подобра контрола на финансиските ризици поврзани со дигиталните средства.

Од Binance за Ројтерс изјавиле дека компанијата веќе 18 месеци активно соработува со надлежните институции и дека е уверена оти ги исполнува барањата предвидени со регулативата MiCA.

Компанијата додава дека работи на тоа процесот да помине што е можно поуредно и без поголеми последици за корисниците.

Доколку одлуката за одбивање на лиценцата биде потврдена, Binance од почетокот на јули би можел да остане без можност да работи на европскиот пазар, што би можело да има значително влијание врз милиони корисници и да внесе нова неизвесност во криптоиндустријата во Европа.