Срушил куќа која била заштитено културно наследство, и без дозвола си изградил нов објект

СВР Куманово поднесе кривични пријави против Ф.Ф. (52) и Л.Т. (52), двајцата од Куманово, поради сомнение за сторување повеќе кривични дела поврзани со уништување на културно наследство, бесправно градење, узурпација на недвижности и несовесно работење во службата.

— реклама —

Според Министерството за внатрешни работи, првопријавениот во 2023 година срушил и уништил куќа која претставувала заштитен објект на културното наследство, на која била поставена спомен-плоча на народниот херој Киро Нацев Фетак.

— реклама —

Објектот бил евидентиран како заштитено културно наследство согласно законските прописи и бил дел од програмата за одбележување значајни личности и настани во Општина Куманово.

По уривањето на куќата, пријавениот како инвеститор изградил објект од втора категорија без претходно одобрение за градење од надлежниот општински сектор за урбанизам, со што постапил спротивно на Законот за градење. Дополнително, објектот бил изграден на земјиште кое е во сопственост на државата.

— реклама —

Втората пријавена, која работела како овластен градежен инспектор, според полицијата несовесно ги извршувала своите службени должности. Таа донела решение врз основа на нецелосно и неточно утврдена фактичка состојба, иако била должна да ја утврди согласно законските одредби за инспекциски надзор и градење.

По документирањето на случајот, против двете лица се поднесени соодветни кривични пријави до надлежното обвинителство.