Италијанскиот регулатор за заштита на конкуренцијата и потрошувачите отвори истрага против шпанската нискобуџетна авиокомпанија „Волотеа“ поради сомнежи дека со наплата на дополнителен надомест за гориво по купувањето на билетите ги прекршила правилата за заштита на потрошувачите.
Според соопштението на регулаторот, компанијата вовела нова ценовна политика со која цените на билетите се усогласуваат со растот на цената на керозинот, поврзан со конфликтот меѓу Иран и Израел.
Регулаторот наведува дека патниците биле информирани за дополнителните трошоци дури по купувањето на билетот и непосредно пред датумот на поаѓање. Од нив било побарано да платат доплата од шест до 14 евра по лице и по лет, во зависност од движењето на цената на суровата нафта од типот Брент.
Патниците имале можност бесплатно да го променат летот или да ја откажат резервацијата, при што средствата им биле вратени преку ваучер на компанијата. Меѓутоа, доколку не ја платат дополнителната сума за гориво, нивната резервација била поништена без право на паричен поврат.
Според италијанскиот регулатор, ваквата практика може да претставува прекршување на правата на потрошувачите бидејќи патниците носеле одлука за купување врз основа на нецелосни информации за конечната цена на билетот.
Покрај истрагата, регулаторот започнал и постапка за привремени мерки со цел веднаш да се запре практиката на еднострано менување на цените на авионските билети според движењето на цената на нафтата.
Слични забелешки претходно изнесе и шпанското здружение за заштита на потрошувачите „Факуа“, кое уште во април побара истрага за ценовната политика на „Волотеа“. Од авиокомпанијата засега нема официјален коментар за постапката што се води во Италија.
