ЛДП бара СДСМ и ВМРО-ДПМНЕ да вратат четири милиони евра: „Не во наше име!“

Либерално-демократската партија остро реагира на јавната комуникација меѓу СДСМ и ВМРО-ДПМНЕ, оценувајќи дека политичката дебата во земјава е сведена на навреди, квалификации и меѓусебни пресметки.

Од ЛДП бараат „главните партии“ да ги вратат парите што ги добиваат преку државното финансирање на политичките партии, посочувајќи сума од четири милиони евра.

— реклама —

„Ова што го прават СДСМ и ВМРО-ДПМНЕ од највисоко ниво, од нивните лидери преку нивните партиски соопштенија, е дегутантно. На секој граѓанин и на секој образован човек му се превртува во утробата кога ги гледа и слуша секојдневните меѓусебни пресметки“, велат од ЛДП.

Партијата оценува дека јавниот простор е преплавен со навреди и дека нормалната политичка дебата е заменета со квалификации како „лажго“, „арамија“, „мекотел“, „безрбетен“, „квинслинг“, „душман“, „предавник“, „крвник“, „измеќар“, „пион“, „вазал“, „анароден“, „профитер“, „рекетар“, „клептоман“, „талог“ и „идиот“.

„Кога еден лидер на помала партија почна да го користи овој ужасен речник, наместо сите да го осудат и изолираат, сега и ‘главните партии’ почнаа да го практикуваат“, наведуваат од ЛДП.

— реклама —

Оттаму велат дека наместо политичките партии да понудат идеи за економски развој, реформи во образованието и подобрување на животниот стандард, граѓаните секојдневно сведочат на меѓусебни навреди.

„Како дното да нема крај. Ваквите кафански муабети можат само да ја уништат државата, а не да ја направат развиена“, се наведува во соопштението.

— реклама —

Поради тоа, ЛДП бара парите што се издвојуваат за финансирање на политичките партии да им бидат вратени на граѓаните.

„Затоа, ЛДП бара ‘главните партии’ веднаш да им ги вратат парите на граѓаните, односно сите четири милиони евра што се земаат за финансирање на политичките партии. Граѓаните не можат да врзат крај со крај, па уште мора да одвојуваат од својот џеб за ‘главните партии’ да ги користат тие средства за ширење омраза и меѓусебно понижување“, велат од партијата.

ЛДП повикува на враќање на, како што велат, достоинството во политиката и културата на дијалог.

„Ова не е Македонија каква што ја сакаат нејзините граѓани — Македонија заслужува култура на дијалог како што нè учеа родителите, меѓусебна почит и одговорност пред народот. Не во наше име! Од ЛДП никогаш нема да видите ваков примитивизам“, порачуваат од партијата.

На крајот, ЛДП упатува повик до граѓаните, интелектуалците и другите општествени чинители заеднички да ја осудат ваквата политичка комуникација.