ЛДП: Додека вие избирате меѓу многудетни семејства и странски работници, светот избира вештачка интелигенција! Време е за состанок со 21 век

Додека ВМРО-ДПМНЕ и СДСМ водат дебати за потребата од странски работници во Македонија до 2030 година, Либерално-демократската партија (ЛДП) преку соопштение предупредува дека во јавната расправа се занемарува прашањето за вештачката интелигенција и автоматизацијата.

— реклама —

Од партијата оценуваат дека наместо политички препукувања и лицитирање со бројки за потребната работна сила, на државата ѝ е потребна долгорочна стратегија за развој на технологијата и подготовка на институциите и граѓаните за промените што ги носи.

— реклама —

Според ЛДП, клучното прашање не е само колку работници ќе ѝ недостигаат на земјава во 2030 година, туку и колку работни места ќе се променат под влијание на новите технологии. Партијата посочува дека вештачката интелигенција може да автоматизира голем број административни задачи и да придонесе за поефикасна работа на институциите.

Од ЛДП сметаат дека дигитализацијата може да помогне во надминувањето на проблемите со партизацијата, неефикасноста и лошото управување, нагласувајќи дека технологијата треба да им служи на граѓаните, а не на партиските интереси.

— реклама —

Партијата ги повика ВМРО-ДПМНЕ, СДСМ и ДУИ да ги надминат, како што наведува, застарените политички пристапи и да понудат конкретни решенија за иднината. Според ЛДП, потребни се инвестиции во знаење, дигитални вештини, современи институции и нови технологии, наместо средства за партиски институти и продолжување на политичките препирки.

„21 век одамна започна. Време е и македонската политика да пристигне во него“, порачуваат од ЛДП.