Доспеаните, а неплатени обврски на државата достигнале 692,5 милиони евра, што претставува зголемување од повеќе од 26 милиони евра за само шест месеци, предупредува Либерално-демократската партија (ЛДП) преку соопштение.
Според податоците на Министерството за финансии објавени во последната „должничка листа“, неплатените обврски на крајот на јуни годинава изнесуваат речиси 700 милиони евра. Во споредба со март 2026 година, долгот е зголемен за дополнителни 17,5 милиони евра.
Од ЛДП посочуваат дека станува збор за средства што државата им ги должи на компании, граѓански организации, јавни институции и други субјекти. Само обврските кон приватниот и граѓанскиот сектор надминуваат 315 милиони евра.
Партијата прашува како може државата од граѓаните да очекува редовно исполнување на нивните обврски, додека истовремено дозволува да се наталожат стотици милиони евра неплатени сметки кон приватниот сектор и институциите.
„Граѓаните имаат право да знаат зошто државата бара од нив редовно да ги плаќаат своите обврски, додека самата држава создава милионски долгови кон приватниот сектор и институциите“, наведуваат од ЛДП.
Оттаму додаваат дека граѓаните во исто време се соочуваат со зголемени трошоци за секојдневното живеење, поскапи услуги и повисоки банкарски трошоци. Според ЛДП, додека семејствата внимаваат на секој потрошен денар, државата дозволува да се зголемуваат неплатените обврски, а граѓаните дополнително плаќаат провизии и административни трошоци за располагање со сопствените средства.
„Не може да зборуваме за здрава економија ако државата доцни со плаќањата, јавните претпријатија создаваат огромни долгови, а трошокот за неефикасноста на системот на крајот го плаќаат граѓаните“, велат од партијата.
ЛДП бара Владата и Министерството за финансии јавно да ги објаснат причините за растот на доспеаните и неплатени обврски, како и да посочат кога и на кој начин ќе бидат намирени долговите кон приватниот и граѓанскиот сектор.
Од партијата бараат и информации за мерките што Владата планира да ги преземе за да се спречи понатамошното задолжување на државните компании и да се обезбеди поголема финансиска дисциплина во државните и локалните институции.
„Со јавните пари мора да се управува одговорно, транспарентно и во интерес на граѓаните, а не за одржување на неефикасен систем на државни компании и институции. Државата не смее да биде најголем должник, додека граѓанинот е најредовен плаќач“, порачуваат од ЛДП.
