На денешната прес-конференција, членот на Извршниот одбор на ЛДП, Илија Чилиманов изјави дека Либерално-демократската партија (ЛДП) бара Собранието уште денес, со консензус, да ги усвои техничките измени на Изборниот законик што произлегуваат од препораките на ОБСЕ и ОДИХР, оценувајќи дека не смее да се доведе во прашање европското финансирање поради политички несогласувања.
На прес-конференција, членот на Извршниот одбор на ЛДП, Илија Чилиманов, истакна дека пред доаѓањето на еврокомесарката Марта Кос, институциите треба да покажат одговорност и да ги усвојат измените што се бараат од Европската Унија.
Од ЛДП сметаат дека политичките пресметки не смеат да бидат причина за блокирање на средствата наменети за граѓаните и ја повикаа Владата преку Министерството за правда веднаш да ги достави техничките измени во Собранието.
Партијата, сепак, предупреди дека само со усвојувањето на измените на Изборниот законик нема да се обезбеди целата финансиска поддршка од Планот за раст. Според ЛДП, со овие измени би се деблокирале околу четири милиони евра поврзани со изборните реформи, но повеќе од 70 милиони евра ќе останат недостапни сè додека не се реализираат и реформите во правосудството.
Од ЛДП побараа Владата да обезбеди напредок и во усвојувањето на законите од правосудниот пакет, кои бараат двотретинско мнозинство, со цел да не се загубат средствата од Реформската агенда.
Во однос на пошироките измени на изборниот модел, партијата смета дека политичкиот дијалог треба да продолжи по заминувањето на еврокомесарката, повторувајќи дека нивните клучни заложби остануваат воведување една изборна единица и отворени листи.
