Либерално-демократска партија преку соопштение побара итно формирање Комисија во рамки на Општина Ресен за проценка на штетите предизвикани од измрзнувањето на овошките во Преспанскиот регион.
Од партијата во соопштението посочуваат дека по нестабилните временски услови и ниските температури, земјоделците од Ресен и Преспа се соочуваат со големи загуби на плодови и насади, при што најпогодени се сливите и јаболката.
„Како регион чија главна стопанска гранка е земјоделството, од особена важност е општината да им излезе во пресрет на граѓаните кои својата егзистенција ја обезбедуваат од одгледување овошје“, наведуваат од ЛДП.
Партијата оценува дека со формирање на ваква комисија и со навремена проценка на штетите, локалната самоуправа ќе покаже дека работи во интерес на жителите и на земјоделците во Преспа.
