ЛДП: Михаилова ни докажа дека во владата го изгубиле огледалото – ќе има ребаланс, па да им купиме едно за да се погледнат самите себе

Либерално-демократската партија (ЛДП) преку соопштение ја обвини Владата дека ја избегнува одговорноста за институционалните пропусти и случајот „Михаилова“, префрлајќи ја вината на други наместо да се соочи со сопствените слабости. Партијата упати и ироничен предлог за најавениот ребаланс на буџетот – да се издвојат средства за купување огледала за владината сала и за кабинетите на министрите.

— реклама —

Од ЛДП велат дека, наместо да преземе одговорност за состојбите во институциите и безбедносните пропусти, власта се обидува да ги оправда своите постапки со изјави и префрлање на вината. Според партијата, тоа особено доаѓа до израз по случајот „Михаилова“, додека премиерот најавува интензивирање на средбите и продолжување на евроинтегративниот процес, а од владејачките редови се упатуваат обвинувања кон соседството и опозицијата.

ЛДП ја критикува и економската политика на Владата, наведувајќи дека таа се задолжува прекумерно, не се соочува со проблемите во пензиските фондови и со недостигот од средства за субвенции. Партијата оценува дека Собранието се користи за партиски потреби наместо за донесување системски закони.

— реклама —

„Одговорност, дами и господа од власта, имате одговорност која мора да ја преземете!“, порачуваат од ЛДП.

— реклама —

Од партијата сметаат дека изјавите оти правдата порано или подоцна ќе стигне до секого не се доволни за да се прикријат институционалните слабости и губењето на довербата во државните институции.

Како одговор на најавениот ребаланс на буџетот, ЛДП предлага да се обезбедат средства за едно големо огледало во салата каде што се одржуваат владините седници, како и за по едно во секој министерски кабинет. Според партијата, тоа би им помогнало на владините функционери секојдневно да се соочуваат со сопствените ветувања и резултатите од нивното работење.

Од ЛДП додаваат дека на Владата ѝ е потребно вистинско огледало што ќе ја прикажува реалноста, а не „волшебно огледало“ што ќе ја уверува дека е најдобра и најуспешна. Според партијата, додека власта не се соочи со сопствените пропусти, нема да може да го прикрие институционалниот хаос со односи со јавноста и празни ветувања.